Sylwia Nowakowzka, eiginkona Guðmundar Felix Grétarssonar, segir Guðmund vera í góðu standi en hann fór í aðgerð í Lyon síðastliðinn miðvikudag þar sem tveir handleggir voru græddir á hann. Þetta kom fram í kvöldfréttum Stöðvar 2.
„Ég talaði við hann í fyrsta skipti í morgun eftir aðgerðina. Hann hefur það mjög, mjög gott og var ótrúlega bjartsýnn og jákvæður,“ sagði Sylwia í samtali við Vísi um málið og bætti við að Guðmundur, sem hún kallar Felix, væri með skilaboð til íslensku þjóðarinnar.
„Felix segist vera einstaklega þakklátur öllum þeim stuðningi sem hann hefur fengið frá Íslendingum og segir að þetta hefði aldrei orðið að veruleika ef það væri ekki fyrir íslensku þjóðina,“ sagði Sylwia.
Líkt og áður segir undirgekkst Guðmundur Felix aðgerð þar sem handleggir voru ágræddir á hann en hann missti báðar hendurnar í kjölfar vinnuslyss fyrir rúmum tveimur áratugum. Hann hefur síðastliðin ár búið í Lyon og beðið eftir aðgerðinni.
Að sögn Sylwiu fór aðgerðin fram nánast sama dag og slysið varð, þann 12. janúar 1998, en aðgerðin tók um fimmtán klukkustundir og var þar um að ræða fyrstu handaágræðsluna í Lyon. Vel er nú fylgst með Guðmundi.
