Guð­mundur: Rangt að tala um veiruna sem óvin – Nefnir það já­kvæða við far­aldurinn

Guð­mundur Andri Thors­son, þing­maður Sam­fylkingarinnar, segir að honum hafi fundist eitt í ræðu Katrínar Jakobs­dóttur for­sætis­ráð­herra í fyrra­kvöld ekki alveg sýna rétta hugsun.

„Það var þegar hún fór að tala um veiruna sem óvin sem þyrfti að sigrast á. Ég veit að þetta var líkinga­mál en ég held samt að ef það er eitt­hvað sem þetta mál allt hefur kennt okkur þá er það að náttúran er ekki ó­vinur sem þarf að brjóta undir sig eða sigra heldur um­hverfi okkar sem við þurfum að laga okkur að og lifa í og lifa með,“ sagði Guð­mundur Andri í ó­undir­búnum fyrir­spurna­tíma á Al­þingi í gær.

Guð­mundur Andri tók þó fram að honum hafi þótt ræðan prýði­leg. Hann nefndi svo það já­kvæða sem veiran hefur haft í för með sér.

Jörðin fengið tóm til að anda

„Sé eitt­hvað já­kvætt sem veiran hefur haft í för með sér þá er það að jörðin hefur fengið ör­lítið tóm til að anda. Það hefur dregið um stund úr þeirri gegndar­lausu rán­yrkju sem fer fram á tak­mörkuðum auð­lindum jarðarinnar og olíu­notkun skreppur saman. Nú er lag,“ sagði Guð­mundur Andri sem beindi orðum sínum að Guð­mundi Inga Guð­brands­syni, um­hverfis- og auð­linda­ráð­herra. Spurði hann hvort ekki væri núna tóm til að endur­skoða og endur­meta alls konar ó­siði í um­gengni við náttúruna.

„Við upp­lifum loksins sam­drátt í losun gróður­húsa­loft­tegunda, eigin­lega nauð­beygð,“ bætti hann við.

Getum lært ýmislegt

Guð­mundur Ingi steig í pontu og sagði mikil­vægt að mál­efnið yrði rætt frekar í þing­sal.

„Ég hef sagt það um þá breytingu sem orðið hefur í kjöl­far kórónu­veirunnar á t.d. losun gróður­húsa­loft­tegunda að ég vildi að hún væri út af ein­hverju öðru en kórónu­veirunni, að við værum að ná þessum árangri í heiminum með sam­stilltu á­taki til að draga úr losun. Það sem ég held að við getum lært af þessari veiru og því sem hér hefur gerst hvað varðar t.d. sam­drátt í losun gróður­húsa­loft­tegunda er ein­mitt að sam­staðan sem hér hefur verið svo góð og svo mikil í sam­fé­laginu til að takast á við veiruna er akkúrat sam­staðan sem við þurfum til að geta tekist á við lofts­lags­breytingar,“ sagði Guð­mundur Ingi meðal annars.

Hann bætti við að við­búið væri að losunin færi aftur upp til skamms tíma en verk­efnið til lengri tíma sé að ná henni niður líkt og gerst hefur núna. Nefndi hann að ríkis­stjórnin hefði þegar gripið til að­gerða til að flýta orku­skiptum, til að flýta kol­efnis­bindingu og setja meira fé í ný­sköpun. Það muni nýtast í því starfi sem þarf að eiga sér stað.