Guðmundur Þórður Guðmundsson, landsliðsþjálfari karla í handbolta, minnist vinar síns, Alexei Trúfan, sem lést á dögunum, 61 árs að aldri.
Alexei er mörgum íslenskum handboltaunnendum að góðu kunnur en hann var í hópi allra bestu leikmanna efstu deildar meðan hann spilaði í deildinni á tíunda áratug liðinnar aldar.
Guðmundur rifjar upp í hjartnæmri færslu á Facebook þegar hann fór til Moskvu til að skoða leikmann fyrir handboltalið Víkings. Leikmaðurinn sem um ræðir var Alexei Trúfan.
„Til stóð að skoða Alexei á æfingu með liðinu sem hann spilaði með. Þjálfari liðsins var Youri Klimov ðmargreyndur fyrrverandi leikmaður Sovéska landsliðsins og varð hann m.a. Ólympíumeistari með liðinu í Montreal árið 1976. En þegar ég kom í íþróttahúsið voru þar aðeins þjálfarinn Youri Klimov, Alexei Trufan og 1 markmaður. Ég man að ég lét Alex skjóta á markið, hlaupa hraðaupphlaup og svo tók hann varnarskref sem ég bað hann um. Ég var ekki lengi að taka ákvörðun,“ segir Guðmundur.
Svo fór að Alexei skrifaði undir samning við Víkinga og naut félagið góðs af kröftum hans um tíma.
„Hann var stórkostlegur leikmaður. Yfirburða varnarmaður og mjög góður sóknarmaður. Hann var ósérhlífinn og frábær keppnismaður. Það var góð tilfinning að spila við hliðina á honum. Eftir að hafa spilað frábærlega fyrir Víking tók við farsæll ferill m.a. með UMFA og FH,“ segir Guðmundur.
Í upprifjun Vísis um Alexei Trúfan sem birtist í gær kom meðal annars fram að hann hafi leikið lykilhlutverk í vörn Aftureldingar þegar liðið vann deildarmeistaratitilinn tímabilið 1996/97. Trúfan lék einnig nokkra leiki með Val tímabilið 2002/03 en þá var hann kominn vel yfir fertugt. Sannarlega frábær íþróttamaður.
Guðmundur segir að hann hafi tileinkað honum þa sem kallað er að taka „Trúfan“ þegar glímt er við línumenn. „Hann kom með nýja vídd inn í íslenskan handbolta hvað varnarleik varðar. Blessuð sé minning þessa góða drengs,“ segir Guðmundur að lokum.
