„Ríkisstjórninni finnst nóg að henda 9.244 kr. í eldri borgara en Katrínu finnst eðlilegra að hrifsa til sín 73.000 auk fulls jólabónus!! Siðblindan á fullu stími.“
Þetta segir Guðmundur Gunnarsson, fyrrverandi formaður Rafiðnaðarsambands Íslands. Guðmundur deilir frétt Vísis frá því í gær þar sem greint var frá launahækkunum þingmanna og ráðherra um áramótin. Launin hækka um 3,4 prósent sem þýðir hækkun upp á 40.000 krónur á grunnþingfararkaup. Laun Katrínar hækka um 73.000 krónur en aðrir ráðherrar hækka um 66.000 krónur.
Guðmundur skrifar pistil af þessu tilefni á Facebook-síðu sína þar sem hann ræðir þá gjá sem komin er á milli þróunar ellilífeyris og launa. Þá segir hann að ríkisstjórnin hafi valið þá leið að veitast að eldri borgurum og bregða fyrir sig venjubundnum reiknikúnstum.
„Ríkisstjórnin rökstyður mál sitt með fullyrðingu um að frá janúar 2017 til júlí í ár hafi neysluvísitalan hækkað um 10,6% en bætur almannatrygginga um 20,5%. Þessi forsenda er röng, enn eina ferðina bregða þingmenn fyrir falsútreikningum. Óskertur ellilífeyrir hefur á þessu tímabili nefnilega hækkað um 12,3%, ekki 20.5%,“ segir Guðmundur sem birtir reikningsdæmi máli sínu til stuðnings.
„Ellilífeyririnn var 228.734.- kr. árið 2017. Ef við hækkum þá tölu um 20,5%, eins og ríkisstjórnin fullyrðir, þá væri ellilífeyririnn í dag 275.600.- kr. En ellilífeyririnn er hins vegar í dag einungis 256.789 kr. Ef réttur ellilífeyrir væri hækkaður um 3,6% eins reiknað er með í fjárlagafrumvarpinu þá ætti hann að hækka í 285.500.- kr. Ríkisstjórnin hafnar sáttatillögu eldri borgara um að lífeyrir hækki jafnmikið og önnur laun eða um 15.750.- og ellilífeyrinn yrði þá 272.539.- kr. Ríkisstjórnin ætlar hins vegar að hækka ellilífeyri einungis um 9.244.- kr. þeas í 266.033.- kr. Það vantar þannig 19.467.- kr. upp á að ellilífeyririnn væri eins hann ætti að vera.“
Guðmundur lítur svo á að um sé að ræða svik við eldri borgara með ómerkilegum reiknikúnstum. Ekki sé nóg að leggja allt að 80% jaðarskatta á þann sparnað sem launamenn eiga í lífeyrissjóðum. Fullyrðir hann að gjáin milli þróunar ellilífeyris og launa á vinnumarkaði hafi farið vaxandi síðastliðin fjögur ár.
„Ríkisstjórnin stefnir á að skilja ellilífeyrisþega eina eftir og hafnar því að ná sátt við þennan sem á engan málsvara, hefur ekki samningsrétt og er því algjörlega háður ákvörðun stjórnvalda. Það verður áhugavert á heyra af tillögum um launahækkanir alþingismanna sem eiga að koma til framkvæmda um n.k. áramót. Ríkisstjórninni finnst nóg að henda 9.244 kr. í eldri borgara en Katrín finnst eðlilegra að hrifsa til sín 73.000 auk fulls jólabónus!! Siðblindan á fullu stími.“
Gunnar Smári Egilsson, stofnandi Sósíalistaflokksins, leggur orð í belg um málið á Facebook-síðu flokksins.
„Munið þið eftir þessum hjartnæma kynningarfundi, atvinnuleysisbætur hækkaðar um 17.920 kr. um áramótin með lúðraþyt og söng? Ráðherrarnir sögðust hafa teygt sig upp í topp, meira mætti ekki hækka atvinnuleysisbætur án þess að kollvarpa ríkissjóði. Í dag var sagt frá því að þeirra eigin laun myndu hækka um 73.072 kr. um áramótin, meira en fjórum sinnum meira en atvinnuleysisbætur. Þetta segir allt sem segja þarf um þessa ríkisstjórn hinna best settu.“
