„En ég vil bara benda á það að siðaðar þjóðir eru löngu hættar þessu. Ef þær geta hætt þessu, hvers vegna í ósköpunum erum við þá að gera þetta?“
Þessari spurningu varpaði Guðmundur Ingi Kristinsson, þingmaður Flokks fólksins, fram á Alþingi í gær. Þar beindi hann fyrirspurn til Kristjáns Þórs Júlíussonar um svokallaðar blóðmerar sem Hringbraut fjallaði um á dögunum. Þá er blóð tekið úr fylfullum merum í þeim tilgangi að vinna dýrmætt hormón sem finna má í fylgjunni. Það hefur meðal annars því hlutverki að gegna að örva starfsemi eggjastokka og er einna helst notað í svínarækt.
Áður hafði Ágúst Ólafur Ágústsson, þingmaður Samfylkingarinnar, vakið athygli á málinu.
Guðmundur Ingi benti á að líftæknifyrirtæki borgi hátt verð fyrir hormónið og því hafi blóðmerahald aukist til muna hér á landi á síðustu árum.
„Á nokkrum stöðum er þetta orðið stórbúskapur með allt að 200 hryssur í blóðframleiðslu. Miklir fjárhagslegir hvatar eru til staðar til að hámarka afköstin og því eru blóðmerar látnar ganga með folöld eins oft og mögulegt er, eða þar til hormónið fyrirfinnst ekki lengur í blóði þeirra og þá er þeim slátrað. Folöldin fara jafnan beint í sláturhús.“
Guðmundur Ingi spurði Kristján Þór hvað honum fyndist um þetta. Kristján svaraði því til að honum fyndist langt seilst að segja að um dýraníð sé að ræða. Um sé að ræða starf sem unnið er undir eftirliti dýralækna og Matvælastofnunar.
„Þegar ég spurður hvað mér finnist um þessa starfsemi finnst mér ekki nein innstæða fyrir þeirri fullyrðingu að fella alla þá sem undir þessum hatti starfa undir það að þarna sé stórfellt dýraníð í gangi, mér finnst það ekki skynsamlegt og ekki eðlilegt. Ég hef ekki fengið kvartanir um slíkt inn á mitt borð sem ráðherra málaflokksins og mér kæmi verulega á óvart ef þeir sem eru í þessari atvinnustarfsemi ynnu með þeim hætti,“ sagði Kristján Þór.
Guðmundur Ingi steig aftur í pontu og benti á að siðaðar þjóðir væru löngu hættar þessari starfsemi. Velti hann því fyrir sér hvers vegna við gerðum það ekki líka.
„Hver er tilgangurinn? Og svo segir hann að þetta sé undir eftirliti Matvælastofnunar. Jú, en það er búið að fella það undir tilraunum á dýrum, dýratilraunum, ekki velferð dýra. Ég spyr: Hvers vegna í ósköpunum er það þar undir? Og ef þetta er allt í lagi, hvers vegna í ósköpunum þarf að pína hrossin og taka úr þeim blóð til þess eingöngu að auka framleiðslu og getu gyltna til að framleiða meiri kjöt? Getum við verið í fáránlegri stöðu en þetta? Er hægt að leggjast lægra? Ég sé engan tilgang með þessu. Ég spyr: Er ekki löngu kominn tími á að við högum okkur eins og aðrar siðaðar þjóðir og hugsum um velferð dýra og hættum þessu?“
