„Í hvaða veröld búa þessir þingmenn? Hvað fær fólk til þess að setja svona frá sér,“ segir Guðmundur Franklín Jónsson, fyrrverandi forsetaframbjóðandi og mögulegur frambjóðandi í næstu Alþingiskosningum.
Sitt sýnist hverjum um þá þingsályktunartillögu Ólafs Þórs Gunnarssonar og Bjarkeyjar Olsen Gunnarsdóttur, þingmanna VG, um að skoðað verði hvort rukkað verði meira fyrir að eiga bíl. Leggja þau til að samgönguráðherra og umhverfisráðherra meti hvort og þá hvernig hægt sé að veita sveitarfélögum heimild til innheimtu umhverfisgjalda.
Guðmundur Franklín lýsti skoðun sinni á þessari tillögu á Facebook-síðu sinni og er óhætt að segja að hann sé ekki hrifinn.
„Gargandi "snilld" ! Hefur þetta hústökufólk á Alþingi aldrei heyrt talað um bifreiðagjald, úrvinnslugjald, bifreiðatryggingar, vörugjöld á bifreiðar, álögur á eldsneyti eins og olíugjald, kolefnisskatt, bensínskatt, sérstakan bensínskatt, og virðisaukaskatt ofan á allt saman.“
Ekki þykir ólíklegt að Guðmundur Franklín fari í framboð með Frjálslynda lýðræðisflokknum í þingkosningunum á næsta ári. Fari svo að hann nái sæti á Alþingi er ljóst að hann mun ekki samþykkja þessa tillögu þingmanna VG þegjandi og hljóðalaust.
