Guðmundur Franklín Jónsson, frambjóðandi til embættis forseta Íslands, er kokhraustur fyrir kosningarnar ef marka má viðtal við hann í Morgunblaðinu í dag.
Skoðanakannanir benda eindregið til þess að sitjandi forseti, Guðni Th. Jóhannesson, muni vinna afgerandi sigur og hefur fylgi hans í könnunum hingað til mælst í kringum 90%. Þannig mældist fylgi Guðna tæplega 91% í niðurstöðum könnunar EMC Rannsókna sem birtust fyrir sléttri viku.
Þrátt fyrir þetta er Guðmundur kokhraustur en fari svo að hann tapi kveðst hann ekki ætla aftur í framboð.
„Ég fer aldrei aftur í forsetaframboð, en ef þjóðin vill sama mann þá segi ég bara guð blessi Ísland. Ég mun hins vegar vinna kosningarnar,“ segir hann í viðtalinu. Og þegar hann er spurður hvað hann muni gera ef það fer svo að hann tapi segir hann:
„Ég hef engar áhyggjur af sjálfum mér. Ég hef meira og minna verið að koma að rekstri fyrirtækja í gegnum tíðina. En ég er ekki að fara að tapa þessum kosningum.“
