Guð­mundur biður að­stand­endur af­sökunar á fram­göngu fjöl­miðla

Guð­mundur Gunnars­son, rit­stjóri Markaðarins, skrifar grein í Frétta­blaðinu í dagþar sem hann biður að­stand­endur af­sökunar á fram­göngu fjöl­miðla í skotar­ásar­málinu á Blöndu­ósi.

„Það er engin leið að átta sig á á­fallinu sem sam­fé­lagið á Blöndu­ósi varð fyrir í vikunni. Í kjöl­far harm­leiks sem skildi fjöl­skyldur eftir í slíkum sárum að fæst okkar munu nokkurn tímann geta náð utan um sorgina sem þau upp­lifa. Lands­menn hafa sam­einast um að senda hlýja strauma norður í land. Það hefur sam­heldin þjóð gert bæði vel og fal­lega síðustu daga. Eins og hún á vanda til,“ skrifar Guð­mundur.

„Það hefur skapast nokkur um­ræða um þátt fjöl­miðla í málinu öllu. Hvernig frétta­flutningi af harm­leiknum var háttað. Við þessar erfiðu að­stæður. Að­stand­endur, mitt í ó­bæri­legri sorginni, sáu sig knúna til að senda frá sér yfir­lýsingu þar sem að­gangs­harka fjöl­miðla var gagn­rýnd. Það gerðu þau örugg­lega ekki af létt­úð eða án á­stæðu,“ bætir hann við.

„Okkur fjöl­miðla­fólki ber að taka þessi orð til okkar og fara yfir vinnu­brögðin. Gaum­gæfa hvort þau sam­ræmist þeim gildum og reglum sem við störfum eftir. Fjöl­miðlar eru ekki hafnir yfir gagn­rýni. Frekar en aðrar stoðir sam­fé­lagsins. Þótt það sé flókið og vand­með­farið að segja fréttir af á­takan­legum at­burðum þá verða fjöl­miðlar að gæta þess í hví­vetna að sýna nær­gætni.“

Hann segir að síðan megi alveg velta því upp hvort fjöl­miðlar eiga yfir­leitt að fjalla um at­burði af þessu tagi.

„En þá verðum við líka að muna að fjöl­miðlar hafa á­kveðnum skyldum að gegna á slíkum stundum. Þeir brúa jafnan bilið á milli lög­reglu og al­mennings. Með því að birta út­gefnar til­kynningar. Og það er mikil­vægt. En fjöl­miðlar eiga ekki bara að fram­lengja skila­boð stjórn­valda. Þeir eiga líka að leita svara við spurningum og afla upp­lýsinga sem kunna að eiga erindi við al­menning. Það er líka mikil­vægt.“

„Málið er bara að það er ekki alltaf auð­velt að feta þennan þrönga stíg upp­lýsinga­öflunar- og miðlunar án þess að fara of­fari. Sér­stak­lega ekki í jafn við­kvæmum málum og hér um ræðir. En ef það gerist, og okkur verður á í messunni, þá eigum við ó­hikað og undan­bragða­laust að biðjast af­sökunar. Upp­lifun að­stand­enda á Blöndu­ósi bendir til að það hafi ein­mitt gerst í þessu til­viki.“

„Því vil ég að lokum biðja alla að­stand­endur af­sökunar á fram­göngu fjöl­miðla í þessu máli. Af auð­mýkt. Það er það minnsta sem við getum gert. Fjöl­miðlar, eins og aðrir, eiga alltaf að stefna að því að gera betur.“