Guðmundur Gunnarsson, fyrrverandi bæjarstjóri á Ísafirði og fyrrverandi fréttamaður á RÚV, segist hafa fengið þau skilaboð þegar hann byrjaði í fréttamennsku á Akureyri að koma sér í mjúkinn hjá Þorsteini Má Baldvinssyni, forstjóra Samherja.
Guðmundur nam fjölmiðlafræði við Háskólann á Akureyri áður en hann réðst til starfa hjá RÚV. Eitt stærsta fréttamál vikunnar varðar þátt sem Samherji lét framleiða en í honum var látið að því liggja að Helgi Seljan, fréttamaður RÚV, hefði falsað gögn árið 2012. RÚV og Helgi höfnuðu þessum ásökunum strax.
„Markmiðið með þessum drullumokstri er að sverta mannorð öflugasta rannsóknarblaðamanns landsins og hrella fjölmiðla,“ sagði í yfirlýsingu sem Þóra Arnórsdóttir og Helgi Seljan sendu frá sér.
Guðmundur, sem lét af störfum sem bæjarstjóri Ísafjarðar fyrr á þessu ári, skrifar athyglisverða færslu á Twitter þar sem hann segir:
„Þegar ég byrjaði í fréttamennsku á Akureyri var mér sagt að ef ég ætlaði að eiga einhvern séns í nýja djobbinu þá yrði ég að koma mér í mjúkinn hjá Þorsteini Má. Þetta var fyrir 15 árum og heilræðin komu frá reynslumestu fréttamönnunum á svæðinu.“
