Guðmundi Andra Thorssyni, þingmanni Samfylkingarinnar, var brugðið þegar hann las viðtal við Ásu M. Ólafsdóttur í sunnudagsblaði Morgunblaðsins um helgina. Ása er fyrrverandi samstarfskona Guðmundar hjá Máli og menningu og Eddu.
Í viðtalinu sagði Ása reynslu sína af því að greinast með COVID-19. Sex mánuðir eru síðan hún greindist en hún er enn að glíma við eftirköst veirunnar.
„Ég er 52 ára gömul og hef gengið í gegnum ýmis veikindi og ég hef fætt barn. En ég get sagt þér, mér hefur aldrei liðið jafn illa og á þessum tíma. Ég man eftir þremur skiptum sem mér leið svo illa að ég hugsaði: „jæja, er komið að því, er ég virkilega að deyja?,“ sagði hún meðal annars í viðtalinu um fyrstu vikurnar eftir að hún veiktist.
Hún sagði að framfarirnar eftir greiningu hefðu verið hægar, tvö skref áfram og eitt skref aftur á bak. „Ef ég horfi til baka sé ég að ofsaþreytuköstin eru færri núna og þau eru ekki jafn svakalega erfið,“ sagði hún meðal annars.
Guðmundur skrifar hugleiðingar um málið á Facebook-síðu sinna og viðurkennir að honum hafi brugðið við lestur viðtalsins.
„Vonandi verður það og önnur sambærileg til þess að hljóðni þessar raddir sem farnar eru að verða háværari - einkum úr hægra horni stjórnmálanna - um að slaka eigi á veiruvörnunum, með tilheyrandi vangaveltum um að allir þurfi nú að deyja úr einhverju og ekki dugi að setja allt á aðra hliðina í þjóðfélaginu til að vernda bara örlítið brotabrot af broti landsmanna.“
Guðmundur segir augljóst að um mjög skæðan sjúkdóm geti verið að ræða og mörg dæmi séu um einstaklinga sem eru lengi að ná fyrri kröftum. „Því fer víðs fjarri að hér hafi myndast hjarðónæmi og við verðum að halda veirunni í skefjum svo að þessi faraldur gjósi ekki aftur upp.“
Þó nokkrar umræður fara fram undir færslu Guðmundar og meðal þeirra sem blanda sér í málið er Hannes Hólmsteinn Gissurarson, prófessor í stjórnmálafræði.
„Þið hafið engar áhyggjur af atvinnulífinu, af því að ykkar kjósendur eru opinberir starfsmenn, sem þurfa ekki að óttast um vinnuna sína. Þessir kjósendur sitja í vinnunni við tölvuna og setja Like við færslur ykkar Þorvaldar Gylfasonar og Stefáns Ólafssonar. Kostnaðurinn af aðgerðunum falla óskiptar á herðar þeirra, sem skapa verðmætin í landinu.“
Einn segir að fjölmiðlar séu að gera út á „tilfinningaklám“ og ala á sótthræðslu. Egill Helgason fjölmiðlamaður segir ósmekklegt að tala um tilfinningaklám og bendir á fleiri dæmi en frásögn Ásu. „Það er semsé ekki bara spurning um líf og dauða, heldur getur pestin rænt fólk heilsunni - hugsanlega fyrir lífstíð.“
