Guðlaugur Þór Þórðarson, umhverfis-, orku- og loftslagsráðherra, segir að það hafi verið mjög óþægileg tilfinning að fá fréttir af því að mennirnir sem sitja í gæsluvarðhaldi vegna gruns um að leggja á ráðin um hryðjuverk hafi rætt um að myrða hann.
Fréttablaðið náði tali af Guðlaugi Þór eftir ríkisstjórnarfund í morgun þar sem hann fór yfir málið.
Guðlaugur segir að lögregla hafi sett sig í samband við hann um leið og málið kom upp og upplýst hann um stöðuna.
Hvernig var tilfinningin að fá fréttir af þessu?
„Hún var auðvitað mjög óþægileg. Það er ekkert hægt að orða það öðruvísi. Það fyrsta sem kemur upp er hvernig maður útskýrir þetta fyrir fjölskyldunni. Það er auðvitað erfitt, en hins vegar voru viðbrögð lögreglu mjög fagleg og ég fékk allar þær upplýsingar sem hún vissi á þeim tímapunkti.“
Guðlaugur Þór segir að vissulega hafi honum verið brugðið en málið snúist þó ekki bara um hann eða hans fjölskyldu.
„Þetta snýst um alla á Íslandi. Við viljum ekki sjá svona og við þurfum auðvitað að tryggja það að við gerum allt hvað við getum – og nálgumst hlutina með yfirveguðum hætti – til að Ísland verði áfram eins og það er; öruggt samfélag sem okkur líður vel í.“
Hvað finnst þér um að svona mál séu að koma upp hér á landi?
„Auðvitað er það þannig að við erum ekki eyland þó við séum eyland. Það sem gerist annars staðar getur gerst hér. Ég held að sé mjög mikilvægt – og ég legg á það mikla áherslu – að við nálgumst þetta af yfirvegun og skynsemi, öll mál, en sérstaklega svona mál, því við megum alls ekki láta ótta og hræðslu, svo ég tala nú ekki um sterkari neikvæðar tilfinningar, ná tökum á okkur.“
RÚV greindi frá því að mennirnir hafi talið að Guðlaugur væri enn utanríkisráðherra. Aðspurður hvort hann gæti gert sér í hugarlund hvers vegna mennirnir hafi rætt um hann sérstaklega, sagði Guðlaugur Þór:
„Ég geri ráð fyrir að þegar svona mál koma upp er það vegna þess sem stjórnmálamaðurinn hefur gert eða sagt. Það liggur alveg fyrir hvað ég stend fyrir í stjórnmálum og ég hef talað á alþjóðavettvangi fyrir réttindum og frelsi fólks. Kannski var það eitthvað sem mönnum hugnaðist ekki, en ég mun að sjálfsögðu halda því áfram.“
