Svo virðist sem Guðlaugur Þór Þórðarson, umhverfisráðherra, sé búinn að velja sér aðstoðarmann. Samkvæmt vef stjórnarráðsins er Steinar Ingi Kolbeins skráður sem aðstoðarmaður ráðherra á skrifstofu umhverfis- og auðlindaráðuneytis.
Steinar Ingi er á þrítugsaldri og er úr Grafarvogi. Hefur unnið sem blaðamaður hjá Morgunblaðinu, verið virkur í Sjálfstæðisflokknum og stundað nám í stjórnmálafræði.
Hann keppti í úrslitum MORFÍs árið 2015 fyrir hönd Menntaskólans við Sund og var hann valinn ræðumaður Íslands það árið.
Frægastur er hann þó fyrir aðkomu sína að áfengisboði til ungmenna í formannskjöri Heimdalls, félags ungra sjálfstæðismanna í Reykjavík, sem ítarlega var fjallað um á DV og Stundinni á sínum tíma. Var hann í framboði og og setti skilaboð inn á Facebook þar sem hann bauð „öllum MS-ingum“ í „frían hamborgara og bjór.“ Að því loknu færu kjósendur í Valhöll þar sem þeir ættu að greiða listanum sem hann var á atkvæði.
Steinar Ingi setti inn yfirlýsingu á Facebook-síðu skólafélags MS þar sem hann harmaði málið. „Ég harma það mjög að skilaboðin sem eru sýnd á þessum skjáskotum hafi farið í umferð.“ Það hafi ekki verið ásetningur hans sé meðframbjóðenda hans að halda partý „og bjóða öllum nemendum innan MS í stórt partý með fríu áfengi fyrir fólk undir lögaldri.“
Sagði hann við blaðamann að hann væri á fundi en svaraði svo aldrei símanum.
