Gunnar Bragi Sveinsson, þingmaður Miðflokksins og fyrrverandi utanríkisráðherra, og kærasta hans, Sunna Marteins Gunnarsdóttir, samskiptastjóri MS, urðu fyrir því óláni að missa grillið sitt í hendur óprúttinna aðila á dögunum.
Sunna birti tilkynningu þess efnis í Facebook-hópi íbúa í Norðurmýri í gær, en Gunnar Bragi og Sunna eru búsett á Guðrúnargötu.
„Hæ kæru nágrannar – við lentum í því að grillinu okkar með gaskút var rænt af pallinum/svölunum okkar á Guðrúnargötu einhvern tímann sl daga – ef þið sjáið einmanna grill með gaskút í eftirdragi á ferli gæti það verið okkar svo endilega látið mig vita...,“ segir hún.
Svo virðist sem grillþjófar gangi lausir í Norðurmýrinni því annar íbúi segir að grilli hafi einmitt nýlega verið stolið af pallinum við heimili sitt á Guðrúnargötu.
