Forsvarsmenn Gráa hersins hyggjast áfrýja dómi Hæstaréttar Íslands frá byrjun nóvember á síðasta ári í málum þriggja liðsmanna hans til Mannréttindadómstóls Evrópu í Strassborg og hafa málin þegar verið send dómstólnum.
Þetta kemur fram í tilkynningu frá Gráa hernum, enFréttablaðið greinir frá.
Í tilkynningunni segir jafnframt að með áfrýjuninni sé gerð úrslitatilraun til að fá það viðurkennt að núgildandi skerðingarreglur almannatryggingalaga séu úr hófi og standist hvorki íslensku stjórnarskrána né Mannréttindasáttmála Evrópu.
„Við neitum að gefast upp í þessu máli,“ segir Helgi Pétursson, formaður Landssamband eldri borgara.
Mál þremenninganna, þeirra Ingibjargar Sverrisdóttur, Sigríðar J. Guðmundsdóttur og Wilhelms Wessman, á hendur ríkinu, hafi að sögn Gráa hersins ekki snúist um fjárkröfur þeim til handa, heldur hafi tilgangurinn verið að freista þess að ná fram niðurstöðu, sem myndi neyða ríkisvaldið til að breyta regluverki almannatrygginga í það horf að það samræmdist grundvallarreglum réttarríkisins.
Með dómnum hafi Hæstiréttur hins vegar hafnað öllum rökum kærendanna og gefið ríkinu grænt ljós á gildandi skerðingarregluverk. Rétturinn viðurkenni þó að umræddu svigrúmi séu einhver takmörk sett, en láti þó ógert að upplýsa hvar þau mörk liggi og veiti því lítil sem engin svör við því sem fyrir hann hafi verið lagt.
„Við teljum einfaldlega að Hæstiréttur hafi ekki tekið afstöðu til okkar kæruatriða og förum því með málið á meginlandið,“ segir Helgi Pétursson.
„Við ætlum að láta reyna á þetta alla leið,“ bætir Helgi við.
