Lögreglan á Suðurlandi hafði hendur í hári ökumanns á þjóðvegi 1 á dögunum eftir að bifreið hans mældist á 157 kílómetra hraða.
Í skeyti lögreglunnar kemur fram að lögregla hafi verið við eftirlit við Hellisholt í sveitarfélaginu Hornafirði þegar maðurinn var stöðvaður. Að sögn lögreglu gekkst maðurinn undir sektargerð að upphæð 230 þúsund krónur en auk þess var hann sviptur ökuréttindum í tvo mánuði.
Tveir aðrir ökumenn voru stöðvaðir í liðinni viku á yfir 140 kílómetra hraða. Þeir eiga einnig von á dágóðri sekt. Alls voru 37 ökumenn stöðvaðir fyrir of hraðan akstur í umdæmi lögreglunnar á Suðurlandi í síðustu viku.
