Glúmur Baldvinsson, sonur Jóns Baldvins og Bryndísar Schram og frambjóðandi Frjálslynda lýðræðisflokksins í síðustu Alþingiskosningum, ber þjónustu Te og kaffi á Laugaveginum ekki góða söguna í færslu á Facebook.
Hann fór inn í góðu skapi en það entist ekki lengi: „Vaknaði í góðu skapi í morgun og ákvað að tríta mig vel og innilega. Svo ég brá mér á Laugaveginn og ruddist glaðhlakkalegur inná Te og Kaffi. Bauð góðan dag á minni alkunnu vestfirsku, tók ofan hattinn og tyllti mér við næsta lausa borð og beið með bros á vör eftir þjónustu fullur þolinmæði hins hamingjusama manns sem aldrei hefur gert konu mein,“ segir Glúmur.
Kaffihúsaferð Glúms súrnaði þó fljótt: „En viti menn. Þessi gleði entist skammt. Eftir óbærilega bið sem eini kúnninn á móti fjórum starfsmönnum vogaði ég mér að kalla á einn gleraugnagláminn sem þusti framhjá mér án þess að virða mig viðlits og segja: can I have a cafe latte please?“ segir Glúmur.
Upp hófst þá ótrúleg atburðarás: „Þá kom óráðssvipur á minn sem hváði What? Ég aftur: Cafe latte thanks. Maðurinn roðnaði af uppstrektri reiði eða skilningsleysi og virtist ekki skilja hugtakið latte í miðju kaffihúsi. Svo ég spyr á íslensku en þá fer maðurinn í geðrof og skildi ekkert,“ segir Glúmur.
Hann öskraði á afgreiðslufólkið: „Þá var mér nóg boðið og reis upp og gekk að kassanum þar sem stúlkur stóðu í aðgerðarleysi og æpti: get ég fengið fucking cafe latte pretty please with sugar on top? Takk.“
Það eru skýrar reglur inni á Te og kaffi: „Þá varð uppi japl jaml og fuður. Uppúr dúrnum kom að ég mátti ekki panta latte sitjandi heldur standandi. Við svo búið rauk ég út og brosið fokið útí veður og vind. Cafe latte standandi my arse! segir Glúmur af misheppnaðri kaffihúsaferð sinni.
Nokkrir Facebook vinir Glúms taka undir með honum. Ólína Þorvarðardóttir, fyrrum Alþingiskona, kveðst ekki hafa áhuga á því að fara nokkurn tímann aftur á þennan tiltekna stað: „Það getur raunar verið skrýtið að koma inn á Te og kaffi á Laugaveginum. Ég fór þaðan út í fyrra vetur eftir orðaskipti sem ég hirði ekki um að rekja frekar, en urðu til þess að mig langar ekki þangað inn aftur. Ekki þannig að mér hafi verið sýndur dónaskapur - ekki beint - en samt fullkomið viljaleysi til þess að veita sjálfsagða þjónustu. Í afgreiðslunni var ungt fólk með hugann við eitthvað allt annað en óskir viðskiptavina,“ segir Ólína.
Þá baunar Sigurður nokkur á Glúm: „Ég er farinn að hallast á þá skoðun að þú sért maður á röngum stað miðað við ca 4 seinustu mánuði. Þetta miðað við kosningu og seinustu atvik á islandi! Sagt og skrifað án ábyrgðar! Njóttu lífsins minn kæri.“
Glúmur svarar og tekur undir með Sigurði: „að líkindum rétt. Á og átti aldrei heima hér. Fremur í Lattelandi.“
Þorbjörn nokkur sér höggstað á Glúmi: „Ég held að það væri best fyrir þig að hita þitt kaffi heima hjá þér, með speigil fyrir framan þig því þá getur þú rifið kjaft og skammast við sjálfan þig.“
Það er spurning hvort Glúmur muni gera sér ferð á kaffihús á næstunni...
