Gleymir því aldrei þegar hún þurfti fyrst læknis­að­stoð í Sand­gerði – Lítið breyst síðan þá

„Ég gleymi því aldrei þegar ég þurfti fyrst að fá læknis­að­stoð eftir að ég flutti suður með sjó í Sand­gerði, þá 14 ára gömul,“ segir Fríða Stefáns­dóttir, for­maður bæjar­ráðs Suður­nesja­bæjar, í að­sendri grein á Vísi.

Suður­nesja­bær er sveitar­fé­lag á Reykja­nesi sem varð til með sam­einingu Sand­gerðis­bæjar og Garðs sumarið 2018. Í­búar þar eru rúm­lega 3.600 og gagn­rýnir Fríða að í­búar þar séu hvorki með heimilis­lækni né að­gengi að heilsu­gæslu í heima­byggð.

Fríða flutti frá Akra­nesi, eftir að hafa búið í Reykja­vík, til Sand­gerðis þegar hún var 14 ára og viður­kennir hún fús­lega að hafa aldrei þekkt neitt annað en að vera með heimilis­lækni.

„Þegar ég þurfti svo á læknis­hjálp að halda sótti ég þjónustu til heilsu­gæslunnar í Reykja­nes­bæ, þar sem ekki var heilsu­gæsla í minni heima­byggð Sand­gerði. Mamma spurði, eins og sjálf­sagt var, hvort við gætum fengið að skrá okkur hjá heimilis­lækni. Svarið kom okkur í opna skjöldu sem var ein­fald­lega: Það er enginn með heimilis­lækni á Suður­nesjum, sú þjónusta er ekki í boði fyrir Suður­nesja­menn.“

Fríða segir að nú rúmum 20 árum síðar sé þjónustan enn afar tak­mörkuð. Spyr hún hversu lengi ríkið eigi að komast upp með að fram­fylgja ekki lögum og hversu lengi sveitar­stjórnar­menn þurfi að þrýsta á ríkið að bregðast við.

„Nú erum við hjá Suður­nesja­bæ búin að sýna fram­kvæmda­stjóra HSS mögu­legt hús­næði fyrir heilsu­gæslu og erum til­búin að gera allt sem í okkar valdi stendur til að koma til móts við ríkið til að fá þessa grunn­þjónustu í sveitar­fé­lagið. En við fáum engar nýjar upp­lýsingar og engin er upp­byggingin. Ekki nóg með að fá ekki heilsu­gæslu heldur fengum við einnig neitun frá ríkinu um dag­dvalar­þjónustu í sveitar­fé­laginu, þrátt fyrir að sveitar­fé­lagið væri búið að finna til­búið hús­næði fyrir dvölina og ekki gert ráð fyrir því á fjár­lögum næstu ára. Ríkið starf­rækir enga þjónustu í Suður­nesja­bæ, þrátt fyrir að við séum 16. stærsta sveitar­fé­lag landsins af 72.“

Fríða veltir fyrir sér hvort ráða­mönnum þjóðarinnar þyki Suður­nesja­menn vera annars flokks fólk, jafn­vel ofur­menni sem veikjast sjaldnar og þurfa þar af leiðandi ekki heilsu­gæslu í heima­byggð.

„Nú skora ég á ríkið og heil­brigðis­ráð­herra að setja heilsu­gæslu í Suður­nesja­bæ á dag­skrá. Tökum sam­talið og vinnum saman að hag íbúa,“ segir hún.