Gleymir aldrei þegar hann hitti Svavar fyrst: „Hlógum þegar við gáfum manninum sígarettu“

Gunnar Smári Egils­son, einn af stofn­endum Sósíal­ista­flokksins, fer hlýjum orðum um Svavar Gests­son, fyrr­verandi þing­mann og ráð­herra, sem lést í gær, 76 ára að aldri.

Gunnar Smári rifjar upp skemmti­lega sögu af því þegar hann hitti Svavar fyrst, en það var kvöld eitt undir mið­nætti í desember árið 1978 á bíla­planinu fyrir aftan Al­þingis­húsið.

„Það kyngdi niður snjó og við Arnaldur vinur minn vorum að koma af ein­hverju slarki í mið­bænum, 17 ára slánar, á leið vestur í bæ og komum að Svavari þar sem hann var að reyna að koma bíl­druslunni sinni í gang, hafði verið að vinna í Þórs­hamri að því mig minnir,“ segir hann í pistli á Facebook.

Á þessum tíma var Svavar 34 ára, svo til ný­kjörinn á þing eftir að hafa verið rit­stjóri Þjóð­viljans lengi vel og auk þess orðinn við­skipta­ráð­herra. Gunnar Smári segir að Svavar hafi lík­lega verið rót­tækasti sósíal­istinn sem sat þá á þingi.

„Við Arnaldur buðum fram að­stoð okkar, ýttum unga ráð­herranum í gang og hann bauð okkur að launum far heim. Við settumst báðir aftur í eins og þægir piltar. Svavar rétt þá gír­höndina aftur fyrir öxlina og sagði: Slakið jurt strákar. Þetta fannst okkur kostu­legt slangur og hlógum þegar við gáfum manninum sígarettu. Svo reyktum við saman, töluðum um pólitík, sátum kapp­klæddir í bíl­druslu sem dröslaðist gegnum snjóinn án þess að geta hitað upp far­þega­rýmið, það þéttist gufa á gluggana, snjórinn féll úti eins og á jóla­korti.“

Gunnar Smári bendir á að tímarnir í dag séu aðrir, en þarna var enginn ráð­herra­bíll eða bíl­stjóri. Hann segir að eftir kosninga­sigur A-flokkanna vorið áður hefðu breytingar legið í loftinu.

„Meiri­hluti Sjálf­stæðis­flokksins í Reykja­vík hafði fallið í fyrsta sinn sama vor. Það var að vora í vinstrinu, og Svavar var einn af vor­boðunum. En þetta vor endaði snöggt, var sorg­lega stutt og því fylgdi ekkert sumar. Fram undan var ekki sigur vinstrisins, sósíal­ismans eða verka­lýðs­bar­áttunnar heldur þvert á móti, fjöru­tíu ára kaldur niður­lægingar­tími sem okkur auðnast vonandi að brjótast út úr á næstu misserum.“

Gunnar Smári segir að hann hafi hitt Svavar nokkrum sinnum eftir þetta, enda Gunnar Smári í blaða­mennska á meðan Svavar var í pólitík.

„Ég heim­sótti hann fyrir nokkrum misserum og sagði honum frá hvaða hugsanir lágu að baki stofnun Sósíal­ista­flokksins, taldi gott að hann vissi af því. Og þótt ég hafi oft dáðst af mælsku hans og fram­göngu þá hugsaði ég til ráð­herrans unga á biluðu druslunni þegar ég frétti af and­láti hans.“