Eitt glæsilegasta einbýlishús landsins, fasteignin við Hrólfsskálavör 2, er komið í eigu Arion banka en húsið var áður í eigu Skúla Mogensen, stofnanda og fyrrverandi forstjóra WOW air. Greint er frá þessu á vef Smartlandsins.
Húsið sem um ræðir er hannað af Steve Christer og Margréti Harðardóttur hjá Studio Granda. Gríma Björg Thorarensen, unnusta Skúla, og Selma Ágústsdóttir sáu um innanhússhönnun þess.
Húsið var byggt árið 2008 og er það 630 fermetrar að stærð og á þremur hæðum. Hefur það meðal annars að geyma tvo heita potta, fjölskylduherbergi, gufu og líkamsræktaraðstöðu svo fátt eitt sé nefnt. Þá eru allar innréttingar í húsinu sérsmíðaðar.
Óvíst er hvað Arion banki hyggst gera með þetta einstaka hús en það er enn til sölu samkvæmt fasteignavef Morgunblaðsins.
Hér má svo sjá sérstaka heimasíðu sem var sett upp í tengslum við sölu hússins.
