Sigurður Ingi Jóhannsson, samgöngu- og sveitarstjórnarráðherra, hefur lagt fram frumvarp sem á að auka verulega fjármagn til vegaframkvæmda og mæta mikilli þörf fyrir fjárfestingar í samgöngum, bæta umferðaröryggi og stytta og bæta vegtengingar milli byggða. Áætlað er að samvinnuverkefnin geti skapað allt að 4.000 ársverk. Undirbúningur frumvarpsins hefur staðið lengi og er í samræmi við tillögu að samgönguáætlun fyrir tímabilið 2020-2034.
Í frumvarpinu er heimild til að fjármagna samvinnuverkefnin með gjaldtöku af umferð á þeim stöðum sem verkefnin ná til, þ.e.a.s. Sundabraut, tvöföldun Hvalfjarðarganga, Axarvegur og ýmsar framkvæmdir við hringveginn.
„Gjaldtaka vegna notkunar tiltekins mannvirkis skal ekki hefjast fyrr en framkvæmd lýkur og opnað er fyrir almenna umferð,“ segir í frumvarpinu. „Gjaldtaka fyrir hvert mannvirki skal ekki standa lengur en í 30 ár.“
