Gísli Páll ósáttur: „Skammist ykkar“

„Kannast laus­lega við tvo af þremur odd­vitum ríkis­stjórnarinnar. Að góðu einu. Þann þriðja hef ég aldrei hitt,“ segir Gísli Páll Páls­son, for­maður Sam­taka fyrir­tækja í vel­ferðar­þjónustu, í að­sendri grein í Morgun­blaðinu í dag. Grein Gísla ber yfir­skriftina Skammist ykkar.

Gísli segir að rekstrar­grund­völlur hjúkrunar­heimila hafi mark­visst verið veiktur í tíð nú­verandi ríkis­stjórnar, þvert á það sem fram kom í stjórnar­sátt­mála ríkis­stjórnarinnar árið 2017.

Gísli segir að þrí­eykið, odd­vitar ríkis­stjórnarinnar, hafi sett í stjórnar­sátt­mála sinn eftir­farandi orð:

„Einnig verður hugað að því að styrkja rekstrar­grund­völl hjúkrunar­heimila en á­hersla verður einnig lögð á aðra þjónustu­þætti, svo sem heima­hjúkrun, dag­þjálfun og endur­hæfingu.“

Gísli spyr svo hvort þetta hafi gengið eftir og hvort rekstrar­grund­völlurinn hafi verið styrktur. Því er fljót­svarað, segir hann. „Nei, síður en svo. Hann hefur verið mark­visst veiktur í tíð þessarar ríkis­stjórnar, sem er að ljúka næsta haust. Sumir segja sem betur fer. Í stað þess að auka við fjár­fram­lög um­fram launa- og verð­lags­hækkanir, þá eru hjúkrunar­heimilin, auk dvalar- og dag­deildar­heimila, krafin um niður­skurð upp á hálft prósent á ári. Árin 2018, 2019, 2020 og nú stendur til að skera enn og aftur niður um hálft prósent skv. fjár­laga­frum­varpi fyrir árið 2021.“

Gísli segir að á sama tíma hafi nær öll önnur heil­brigðis­þjónusta fengið hækkanir á fjár­lögum um­fram launa- og verð­lags­hækkanir á meðan öldrunar­þjónustan situr eftir.

„Ég er þeirrar skoðunar að þetta sé með vilja gert til að svelta öldrunar­heimilin svo mikið að þau gefist upp og skili rekstrinum til ríkisins. Sem er ná­kvæm­lega það sem er að gerast. Ný­lega var því lýst yfir að ríkið mun taka yfir rekstur allra öldrunar­heimila Akur­eyrar­bæjar um ára­mótin. Hið sama er uppi á teningnum, mis­jafn­lega langt komið, í Vest­manna­eyjum, á Höfn í Horna­firði, Fjarða­byggð og víðar.“

Gísli segir ó­trú­legt að Sjálf­stæðis­flokkurinn láti sig engu varða þessa „grímu­lausu ríkis­væðingu“ öldrunar­þjónustunnar.

„En lengi má manninn reyna og mér sýnist þessi ríkis­stjórn ætla að gera allt hvað hún getur til að keyra öldrunar­heimilin í þrot. Sam­hliða því neyðast stjórn­endur þeirra til að draga úr þjónustu til heimilis­manna, þeirra sem hafa byggt upp þetta á­gæta þjóð­fé­lag sem við búum í. Þau eiga það síst skilið,“ segir Gísli sem endar grein sína á þessum orðum:

„Svona rétt í lokin þá er vert að nefna að Land­spítalinn rekur bið­deild á Vífils­stöðum, hvar ýmiss konar þjónusta er lakari en á hjúkrunar­heimilum landsins. Fyrir það greiðir ríkið, sjálfu sér, rúm­lega 52 þúsund krónur á sólar­hring. Fyrir meiri þjónustu í mun huggu­legra hús­næði, í flestum til­fellum, á hjúkrunar­heimilum landsins greiðir ríkið aftur á móti ein­göngu rúm­lega 38 þúsund krónur. Fyrir lakari þjónustu greiðir ríkið 36% hærra verð, sér­stakt. Það er þetta með Jónana.“