Gísli Marteinn: „Sunda­brú mun AUKA um­ferðar­teppur“

Gísli Marteinn Baldurs­son, fyrr­verandi borgar­full­trúi og sjón­varps­maður, er ekki hrifinn af hug­myndinni um Sunda­brú sem kynnt var í gær.

Sigurður Ingi Jóhanns­son, sam­göngu- og sveita­stjórnar­ráð­herra, kynnti niður­stöður starfs­hóps á vegum Vega­gerðarinnar sem var falið að meta tvo val­kosti um legu Sunda­brautar. Telur hópurinn að Sunda­brú sé hag­kvæmari kostur en jarð­göng.

Gísli Marteinn tjáði sig um niður­stöðuna á Twitter í gær og kallaði eftir því að hver einasta króna sem á að fara í Sunda­brú verði látin renna til við­halds og endur­bóta á hættu­legum vegum úti á landi. Þannig væri hægt að laga um­ferðina bæði í Reykja­vík og á lands­byggðinni.

„Sunda­brú mun AUKA um­ferðar­teppur og mengun í Reykja­vík og á meðan eru ó­boð­legir vegir úti á landi fjár­sveltir.“

Í niður­stöðum starfs­hópsins var það talið vega þyngst að kostnaður við brúar­leiðina væri lægri, brú henti betur fyrir alla sam­göngu­máta og al­mennings­samn­göngur og að ný Sunda­braut á brú bæti sam­göngur innan höfuð­borgar­svæðisins og til og frá borginni með því að dreifa um­ferð, minnka álag á öðrum stofn­vegum og stytta ferða­tíma.

Frið­jón Frið­jóns­son, al­manna­tengill og Sjálf­stæðis­maður, svarar Gísla Marteini og spyr hvers vegna honum sé svona illa við Mos­fells­bæ að vilja að beina allri um­ferð í gegnum hann.

„Mér er svo vel við Grafar­vog að ég vil ekki að Halls­vegurinn verði sú gegnu­maksturs­hrað­braut sem hann verður þegar hann tengist beint inn á Sunda­brú. Mosó mun sannar­lega fara þessa leið í bæinn og Úlfars­fellið sömu­leiðis. Þetta gjör­breytir Grafar­voginum,“ segir Gísli Marteinn.

Því er svo haldið fram í annarri at­huga­semd að vinstri menn segi að öll sam­göngu­mann­virki í Reykja­vík auki um­ferðar­teppur. Því er Gísli Marteinn hjartan­lega ó­sam­mála.

„Alls ekki! Til dæmis mun bæði Borgar­línan og hjóla­stígar draga úr um­ferðar­teppum. Sömu­leiðis göngu- og hjóla­brúin yfir í Kopa­vog. En mis­læg gatna­mót og Sunda­brúin með þeim munu gera akkúrat það sem þau eiga að gera: Auka um­ferð bíla, hraða þeirra og mengun. Og bíla­um­ferðar­teppur.“

Hvernig á að laga umferðina bæði í Reykjavík og á landsbyggðinni:

Setja hverja einustu krónu sem á að fara í Sundabrú, í hættulega vegi úti á landi!

Sundabrú mun AUKA umferðarteppur og mengun í Reykjavík og á meðan eru óboðlegir vegir úti á landi fjársveltir.

— Gísli Marteinn (@gislimarteinn) February 3, 2021