Gísli Marteinn hjólar í borgina: „Al­gjör­lega glatað hjá Reykja­víkur­borg“ – Borgin svarar

Sjón­varps­maðurinn Gísli Marteinn Baldurs­son eys úr skálum reiði sinnar á Twitter í dag. Til­efnið var frétt Frétta­blaðsins frá því í dag sem sýndi bíl á vegum Reykja­víkur­borgar á nagla­dekkjum.

Gísli deilir þar tísti Katrínar Atla­dóttur, borgar­full­trúa Sjálf­stæðis­flokksins, þar sem hún deilir frétt Frétta­blaðsins og skýtur á Reykja­víkur­borg. Henni þykir skjóta skökku við að Reykja­víkur­borg kjósi að setja bílana sína á nagla­dekk þegar borgin sjálf hefur sent frá sér yfir­lýsingu um að nagla­dekk séu ekki góður kostur í Reykja­vík.

Í­búar borgarinnar eru þess í stað hvattir til þess að setja annars konar vetrar­dekk undir bílana sína, svo sem gróf, nagla­laus vetrar­dekk eða heils­árs­dekk. Að baki því liggja ýmsar á­stæður, segir á vef Reykja­víkur­borgar.

Þess má einnig geta að notkun nagla­dekkja er bönnuð frá 15. apríl til 31. októ­ber. Það þekkist þó vel að undan­tekningar séu gerðar þegar tekið er að kólna og frysta á landinu og hefur lög­reglan oft gefið út að öku­menn verði ekki sektaðir ef að­stæður til aksturs eru slæmar.

Gísli hefur verið afar framar­lega í um­ræðu um að banna notkun nagla­dekkja. Þá hefur hann sömu­leiðis talað fyrir stór­minnkaðri notkun einka­bíla og hvetur fólk til þess að nýta sér frekar al­mennings­sam­göngur eða reið­hjól.

Hann tekur því heils­hugar undir með Katrínu og segir: Hár­rétt! Al­gjör­lega glatað hjá Reykja­víkur­borg. Bílar borgarinnar leggja líka iðu­lega uppá gang­stéttum. Af sama meiði og hvað eftir­lit með að verk­takar tryggi hjá­leiðir fyrir gangandi er lé­legt. Greini­legt að stefna toppanna er ekki að ná út í kerfið og það er al­var­legt mál.“

Sá ein­stak­lingur sem stýrir að­gangi Reykja­víkur­borgar á Twitter tók sig til og svaraði bæði Gísla og Katrínu. Sam­kvæmt þeim er um­ræddur bíll á sér­stakri undan­þágu: „Þetta er 2-3 bílar sem eru á undan­þágu sem eftir­lits­bílar í sólar­hrings­þjónustu. Eru fyrstir á staðinn, oft að nóttu eða snemma morguns til að kanna til hvaða að­gerða þurfi að grípa í vetrar­þjónustu,“ segir í svari að­gangs Reykja­víkur­borgar.

Það gæti þó orðið breyting á þessu: „Hins vegar er þetta góð á­bending og mál verða endur­skoðuð eftir helgi,“ segir Reykja­víkur­borg enn fremur í svari til Gísla og Katrínar.

Hárrétt! Algjörlega glatað hjá Reykjavíkurborg. Bílar borgarinnar leggja líka iðulega uppá gangstéttum. Af sama meiði og hvað eftirlit með að verktakar tryggi hjáleiðir fyrir gangandi er lélegt. Greinilegt að stefna toppanna er ekki að ná út í kerfið og það er alvarlegt mál. https://t.co/6jjuREfLJG

— Gísli Marteinn (@gislimarteinn) October 29, 2021