Gísli Halldór Halldórsson, bæjarstjóri Árborgar, glímir enn við eftirköst COVID-19 þó að sex mánuðir séu liðnir síðan hann veiktist. Gísli var í áhugaverðu viðtali í Morgunblaðinu um helgina þar sem ræddi veikindin.
Gísli segir að hann hafi smitast 13. mars og veikst kvöldið eftir en svo vildi til að hann hafði verið að vinna með manni sem var með veiruna.
„Við vorum búnir að vera hér tveir á skrifstofunni og vorum einmitt að ljúka við að skipuleggja allt varðandi Covid; að setja upp viðbragðsteymi og fleira. Ég smitaðist af honum, en við áttum hér saman einn tíu, fimmtán mínútna fund en þá var hann ekki kominn með nein einkenni. Ég virðist hafa smitast af andardrætti í rýminu,“ segir Gísli í viðtalinu.
Samstarfsfélagi Gísla fékk einkenni um kvöldið en Gísli daginn eftir. Gísli segir að hann hafi verið í einangrun í 39 daga en eftir útskrift tók við endurhæfing ef svo má segja, byggja upp þol og úthald. Það gekk vel til að byrja með en eftir þrjár vikur fór Gísli að finna fyrir verulegri þreytu.
„Ég fór varlega í að byggja mig upp og þessi þreytuköst urðu færri og styttri; allt niður í klukkutímalöng,“ segir Gísli sem hefur af og til upplifað þreytuköst í sumar. Hann fór til dæmis í tjaldútilegu í sumar og fékk þá þreytukast og svo var hann þreyttur í þrjá daga eftir að hafa farið út að hlaupa.
„Ég er ekki að glíma við alvarleg eftirköst en það er leiðinlegt að hafa ekki fulla orku,“ segir hann meðal annars í viðtalinu og bætir við að hann mæli ekki með því að fólk næli sér í COVID-19.
