„Smáhýsi í Skógarhlíð er einhver galnasta hugmynd sem borgarstjórn Reykjavíkur hefur fengið,“ segir Guðjón Guðmundsson, íþróttafréttamaður og íbúi í Hlíðunum í Reykjavík.
Guðjón gerir frétt Stöðvar 2 í kvöld að umtalsefni á Twitter en þar var fjallað um áhyggjur íbúa af byggingu smáhýsa í Hlíðahverfi. Gera áætlanir ráð fyrir að þar geti einstaklingar sem glímt hafa við áfengis- og vímuefnaneyslu, eða önnur veikindi, fengið þak yfir höfuðið.
Sitt sýnist hverjum um þetta en íbúar eru ekki sáttir. Þá var bent á það í frétt Stöðvar 2 að tvö félagsleg úrræði séu þegar á svæðinu, Konukot og heimili fyrir geðfatlaða karlmenn. Þá hafi fundist notaðar sprautunálar á svæðinu. Það var svo tekið fram í frétt Stöðvar 2 að nýlega hefði fíkniefnaneytandi fundist látinn úti á svæðinu.
Guðjón segir hugmyndina galna. „Á hvaða ferðalagi er þetta annars ágæta fólk. Dagur.B sá mæti drengur þarf að tukta sitt fólk,“ segir hann. Þá hefur knattspyrnufélagið Valur lýst áhyggjum af áætlunum borgarinnar í málinu. Telur stjórnin það óheppilegt að umrædd búsetuúrræði séu svo nálægt Hlíðarenda þar sem rúmlega þúsund ungmenni æfa íþróttir.
Helgi Seljan, fréttamaður á RÚV, gerir málið einnig að umtalsefni á Twitter og segist efast um að stjórn Vals sé að hugsa um hagsmuni barnanna. „Ég bý nær þessum fyrirhuguðu smáhýsum en obbinn af “íbúum Hlíðanna” og ég frábið mér að Börkur og félagar hans í þessum draumaliðs/championship manager, séu að tala fyrir mig eða mín börn.“
Guðjón Guðmundsson gerir athugasemd við færslu Helga og bendir honum á að sjálfur búi hann í Eskihlíð. „Hér er skelfilegt ástand í barnvænu hverfi sem er nú þegar með fjögur úrræði á sama blettinum. Að setja Smáhýsi í Skógarhlíð er galið og að mínu viti glæpur. Hefur ekkert með Val að gera,“ segir hann og bætir við að hann sé ekki viss um að hann myndi vilja umrædd smáhýsi í sinn bakgarð eins og íbúar í Eskihlíð 6.
„Þetta smáhýsa mál hjá borginni reyndar eitt allsherjar klúður.“
