Brynjar Níelsson, þingmaður Sjálfstæðisflokksins, vakti mikla athygli með pistli sínum á Vísi í gær þar sem hann gagnrýndi sóttvarnaaðgerðir yfirvalda. Sagðist Brynjar vera hættur meðvirkninni með stefnu yfirvalda í sóttvörnum.
Fjölmargir stigu fram og gagnrýndu Brynjar en hann fékk þó stuðning úr ýmsum áttum, meðal annars frá Guðjóni Guðmundssyni, íþróttafréttamanninum knáa á Stöð 2.
„Brynjar Níelsson einn af fáum á Alþingi sem þorir að tjá sig og tala gegn rétttrúnaðinum vegna Covid á Íslandi. Loksins,“ tísti Guðjón meðal annars á Twitter.
Tíst Guðjóns vakti sömuleiðis athygli og meðal þeirra sem gerðu athugasemd var kollegi Guðjóns úr sjónvarpinu, Gísli Marteinn Baldursson fyrrverandi borgarfulltrúi.
„Fyrst þú vilt ekki að við fylgjum ráðum sóttvarnalæknis og annarra sérfræðinga í smitsjúkdómum núna þegar heimsfaraldur gengur yfir - ráðum hverra finnst þér þá að við ættum að fylgja? Brynjars Níelssonar? Eða þínum ráðum minn kæri? Átt þú góðar leiðbeiningar í þessari stöðu,“ spurði Gísli.
Guðjón svaraði að bragði og sagði að hann hefði einfaldlega verið að benda á að þetta sem Brynjar nefndi væri þarft og nauðsynlegt innlegg í umræðuna.
„Öll umræða góð en ég held að best sé að fylgja ráðum hæfasta fólks. Ég veit allskonar um handbolta en vona svo sannarlega að ráðum færasta fólks þar sé fylgt frekar en mínum,“ svaraði Gísli Marteinn.
Ljóst er að skoðanir um sóttvarnaaðgerðir yfirvalda eru mjög skiptar, en það verður ekki framhjá því litið að fjórtán einstaklingar hafa látist hér á landi af völdum veirunnar í yfirstandandi bylgju faraldursins. Erna Ýr Öldudóttir, fjölmiðlakona á Útvarpi Sögu, gerir lítið úr því í athugasemd undir færslu Guðjóns.
„Hefur fólk aldrei dáið úr neinu áður? Hvað eru margir dánir á þessu ári úr hverju sem er? Fengu fjölskyldur þeirra sérstakar kveðjur frá Landspítalanum?“
Brynjar Níelsson einn af fáum á Alþingi sem þorir að tjá sig og tala gegn rétttrúnaðinum vegna Covid á Íslandi.Loksins.Eina.
— Guðjón Guðmundsson (@gaupinn) November 9, 2020
