Gaui litli á sjúkra­húsi eftir slys og kallar eftir að­stoð: Getur þú hjálpað honum?

Guð­jón Sig­munds­son, betur þekktur sem Gaui litli, er nú á sjúkra­húsi eftir að hafa dottið illa í síðustu viku. Gaui lær­brotnaði illa við fallið og sér nú fram á að vera frá vinnu næstu mánuði.

Eins og margir vita hefur Gaui rekið Her­náms­setrið í Hval­firði undan­farin ár og kom slysið í raun á versta tíma fyrir hann. Bráð­lega stóð til að fara að koma safninu í stand fyrir vorið. Þar sem Gaui verður frá líkam­legri vinnu næstu mánuði er ljóst að hann getur ekki tekið þátt í þeirri vinnu.

„Ég þarf þess vegna að leita á náðir ykkar allra, vina, fjöl­skyldu og annarra velunnara Her­náms­setursins við að að­stoða okkur að koma safninu í stand fyrir vorið. Það er í mörg horn að líta og alls konar verk­efni sem þarf að sinna. Það þarf til dæmis að smíða, mála, teppa­leggja, dúka­leggja, parket­leggja, föndra, stilla fram munum og hengja upp, sjá um að út­búa og fram­reiða hressingu, þrífa jafn­óðum og svo alls­herjar þrif í lokin,“ sagði hann í færslu á Face­book-síðu sinni en Mann­líf greindi fyrst frá þessu.

Gaui segir að á­formað sé að skipu­leggja vinnu­daga til dæmis á laugar­dögum og taka þá til hendinni við þessi verk­efni. Að sjálf­sögðu verður á boð­stólunum hressing; matur, drykkur og jafn­vel sæta­brauð auk þess að hafa gaman saman.

„Ég hef síðustu daga fengið fullt af sím­tölum og margir hafa boðið fram að­stoð. Ég er þakk­látur þessari hugul­semi og mun þiggja alla að­stoð sem Her­náms­setrinu býðst og vil endi­lega gefa öllum sem vilja kost á að taka þátt í þessari vinnu með okkur,“ segir Gaui en hægt að er að hafa sam­band við hann í gegnum Face­book, til dæmis með því að skrifa at­huga­semd við færsluna sem hann birtir.

Gaui segir að hann sé á á­gætis bata­vegi og segist hann í sam­tali við Mann­líf vilja koma sér­stöku þakk­læti á fram­færi við starfs­fólk Sjúkra­hússins á Akra­nesi þar sem hann hefur dvalið. „Það er mjög vel hugsað um mig hér sem hraðar öllu bata­ferlinu,“ segir hann meðal annars.