Phoenix Jessica Ramos, fyrrverandi starfsmaður Eflingar, skýtur fast á Sólveigu Önnu Jónsdóttur, formann félagsins, í færslu á Twitter-síðu sinni.
Sólveig Anna steig fram í viðtali við RÚV í gær þar sem hún sagði það ekki vera ofarlega á lista verkalýðshreyfingarinnar að gera þá kröfu í kjarasamningum að erlendu starfsfólki verði gefinn kostur á íslenskukennslu á vinnutíma.
Áður hafði Eiríkur Rögnvaldsson, fyrrverandi prófessor í íslensku, kallað eftir því að verkalýðshreyfingin gerði þá kröfu í komandi viðræðum að erlendu starfsfólki yrði gefinn kostur á íslenskukennslu á vinnutíma.
„Það er náttúrulega bara afskaplega undarlegt að þau sem tilheyra einhverri menntaelítu skuli ætla að setja ábyrgðina á verkalýðsfélög verka- og láglaunafólks sem að augljóslega hafa um stærri og veigameiri hluti að hugsa akkúrat núna heldur en það að vernda íslensku þjóðtunguna,“ sagði Sólveig í viðtalinu við RÚV.
Phoenix, sem hafði starfað hjá Eflingu síðan í febrúar 2020, var sagt upp vegna skipulagsbreytinga á skrifstofu Eflingar en hún sinnti vinnustaðaeftirliti og síðar starfi sem bókari. Hún hefur búið hér á landi frá árinu 2015 og skilur, skrifar og les íslensku en hún talar ekki eins mikla íslensku og hún myndi kjósa.
Hún lýsti því í vor að hún væri búin að sækja um störf aftur hjá Eflingu en kvaðst ekki vongóð um að fá starf. Sagði hún kröfu um góð tök umsækjenda á íslensku máli vera fyrirstöðu. Hún rifjar þetta einmitt upp á Twitter-síðu sinni og skýtur á Sólveigu Önnu.
„Fröken, þú bókstaflega útilokaðir það að ég gæti sótt aftur um starf mitt til tveggja ára eftir hópuppsagnir, með því að setja kröfu um góð tök á íslensku fyrir öll ný störf innan félagsins. En allt í lagi,“ segir hún í færslu sinni í íslenskri þýðingu.
Ma'am you literally barred me from reapplying to my job of two years after the mass layoff by requiring fluent Icelandic for all new jobs at Efling but ok.https://t.co/1mgkYt9IUR
— Phoenix (@PhoenixJRamos) September 11, 2022
