„Fjandskapurinn gegn fjölskyldubílnum kemur fram á ýmsan hátt þessi misserin,“ segir staksteinahöfundur Morgunblaðsins í dag.
Þar er meðal annars rætt um þingsályktunartillögu Ólafs Þórs Gunnarssonar og Bjarkeyjar Olsen Gunnarsdóttur, þingmanna VG, um að bíleigendur verði rukkaðir meira fyrir að eiga bíl en þeir eru þegar rukkaðir. Vilja þeir að samgönguráðherra og umhverfisráðherra meti hvort og þá hvernig hægt er að veita sveitarfélögum heimild til að innheimta svokölluð umhverfisgjöld.
Ekki liggur fyrir hver skrifar staksteina dagsins en sem kunnugt er er Davíð Oddsson ritstjóri blaðsins. Hann segir að fjandskapurinn gegn fjölskyldubílnum komi fram á ýmsan hátt, í Reykjavík til dæmis með lokun gatna, fækkun bílastæða og andstöðu við vegabætur svo dæmi séu tekin.
„Ein helsta þráhyggjan gegn fjölskyldubílnum kemur þó fram í þingsályktunartillögu tveggja þingmanna Vinstri grænna sem leggja hana nú fram í sjötta sinn! Tillagan gengur út á að leggja enn frekari skatta á fjölskyldubílinn og er afsökunin að sú viðbótarskattlagning sé í þágu umhverfisins. Sú röksemd er iðulega notuð til að reyna að leggja auknar álögur á borgarana eða þrengja að þeim á annan hátt, sem er miður. Umhverfið á betra skilið. Þingmennirnir með þráhyggjuna vilja að ofan á háa skatta ríkisins á bifreiðar verði sveitarfélögunum veitt heimild til að leggja á „umhverfisgjöld“.“
Staksteinahöfundur bendir á að þessi viðbót kæmi líka ofan á bílastæðagjöld og gatnagerðargjöld sem sveitarfélögin innheimta, „jafnvel sveitarfélög eins og Reykjavíkurborg þar sem gatnagerð er ekki sinnt, nema þá helst til að hefta umferð“ eins og staksteinahöfundur segir orðrétt.
„Almenningur ætti að vera á varðbergi gagnvart þessari tillögu þó að henni hafi í raun ítrekað verið hafnað. Jarðvegurinn fyrir svona lagað er frjór meðal stjórnmálamanna þó að bifreiðaeigendur viti fullvel að þeir greiða þegar allt of há gjöld.“
