Gagnrýni Salvarar Gullbrár á LXS þættina hefur vakið hörð viðbrögð en Salvör fer ekki fögrum orðum um stelpurnar eða þættina.
„LXS eru nýir sjónvarpsþættir sem sýndir eru á stöð 2, raunveruleikaþættir sem fylgja eftir lífi áhrifavaldanna Sunnevu Einars, Birgittu Lífar, Ástrósar Trausta, Magneu Bjargar og Ínu Maríu. Vinkvennahópurinn er myndaður á þeim forsendum að konurnar sem hann skipa eru fallegar og vinsælar á samfélagsmiðlum, Birgitta líf segir frá því í þáttunum, hvernig hún hóaði hópnum saman þegar henni bauðst að bjóða nokkrum konum með sér í lúxusferð. L-X-S, lúxus, og kannski líka excess,“ skrifar Salvör á RÚV.
Salvör segir þættina bera þess merki að vera auglýsing fremur en raunveruleikasjónvarp. Hugleiðingar Salvarar um hvernig væri hægt að gera þættina áhugaverðari hafa farið fyrir brjóstð á LXS hópnum.
„Ég hefði notið þáttanna betur ef Birgitta Líf hefði farið í reiðikast og sparkað í litla hundinn sinn þegar hún komst að því að lúxusþyrlan sem hún pantaði kæmist ekki upp í fjall til skvísuhópsins í fyrsta þætti. Hún hefði öskrað: „Veistu ekki hver ég er?” á einhvern undirlaunaðan aðstoðarmann um leið og hún hefði ýtt myndavélinni frá sér og strunsað í burtu,“ skrifar Salvör.
„Eða ef Magnea myndi í einstaklingsviðtölunum kalla Ínu Maríu heimska mellu fyrir að hafa hellt áfengum drykk yfir hausinn á henni í sundlauginni í öðrum þætti. Sunneva Einars færi í matarboð til tengdaföður síns, Bjarna Ben, þar sem kæmi í ljós að B. eldri væri ekki par sáttur við starfssvið tengdadótturinnar, hann myndi jafnvel kalla hana druslu eftir einum of mörg hvítvínsglös með humrinum. Benni litli og Sunneva yfirgæfu veisluna með tárin í augunum,“ bætir hún við.
Birgittu er greinilega verulega misboðið og deilir skjáskoti af greininni á Instagram-síðu sinni og spyr: „Hvað gengur á?“ en DV greinir frá.
„Hver nýtur þess að horfa á dýraníð eða dettur svona ógeð í hug? Og vill að fullorðinn maður kalli unga konu druslu?“ skrifar Birgitta ennfremur um umrædda grein.
„Þessu útvarpaði Ríkisútvarpið og setti nú í skriflega frétt. Gagnrýni og skoðanir eru eitt en þetta er eitthvað allt annð. Er í alvöru enginn hjá ykkur sem sér neitt athugavert við svona orðbragð og niðurrif?“
Hún endar færsluna með því að segja RÚV að „gera betur.“
Sunneva gagnrýnir einnig greinina og endurbirtir færslu Birgittu á Instagram, þar sem hún er með yfir 57 þúsund fylgjendur.
„Einn mesti viðbjóður sem ég hef lesið/hlustað á. Sorglegt að sjá konur rakka niður aðrar konur til þess að upphefja sjálfa sig. Erum við ekki komnar lengra en þetta?“ segir hún og bætir við: „Þetta segir meira um siðferði höfundar en þættina okkar. RÚV, gerið betur“
