Þórólfur Matthíasson hagfræðiprófessor veltir því fyrir sér hvort aukin gjaldtaka í sjávarútvegi geti forðað forsvarsmönnum greinarinnar frá axarsköftum sem kalli á rannsóknir erlendra saksóknara.“
Þórólfur dregur dár að málflutningi Magnúsar Arnar Gunnarssonar í svargrein í Fréttablaðinu í dag. Magnús Örn, sem titlar sig framkvæmdastjóra „Rannsóknarmiðstöðvar um samfélags- og efnahagsmál“ skrifaði grein sem birtist í Fréttablaðinu 16. júní s.l. þar sem hann fullyrðir að þeir sem þekki til alþjóðlegs atvinnulífs séu samdóma um að sjávarútvegurinn sé „fremsti atvinnuvegur þjóðarinnar“.
Hann sakar Þórólf og Indriða Þorláksson, fyrrverandi ríkisskattstjóra, um öfund og afbrýði vegna ummæla þeirra í viðtölum við Fréttablaðið í byrjun júní um hvert eðlilegt veiðigjald væri miðað við afkomu í íslenskum sjávarútvegi.
Í grein sinni kemst Magnús Örn að þeirri niðurstöðu af rekstraafkoma íslensks sjávarútvegs sé lakari en afkoma heil- og smásöluverslunar í landinu.
Þórólfur veltir því fyrir sér hvernig það megi vera að sjávarútvegur, sem eina íslenska atvinnugreinin sem skari fram úr á alþjóðavísu, sé með lakari afkomu en aðrar íslenskar atvinnugreinar. „Hvernig í ósköpunum getur sama atvinnugreinin borið af öðrum íslenskum atvinnugreinum og verið í andarslitrunum á sömu stundu? Rannsóknarstofnunarforstjórinn verður að endurskoða rannsóknaraðferðir sínar er ég hræddur um!“
Þórólfur fer yfir samantekt Hagstofunnar sem byggð er á rekstrar- og efnahagsreikningum sjávarútvegsfyrirtækja Þar sem kemur fram að samanlagðar eignir veiða og vinnslu námu 830 milljörðum árið 2020. Samanlagðar skuldir námu 496 milljörðum og hreint eigið fé var 333 milljarðar. Við það bætist svo 100 milljarða hagnaður á árinu 2021.
Lokaorð Þórólfs eru:
„Þá er ótalið það sem kann að vera geymt í skattaskjólum á Kýpur og Maldíveyjum. Af þessu má draga þá ályktun að greinin geti vel greitt eðlilegt gjald fyrir aðgang að þjóðarauðlindinni. Kannski gæti aukin gjaldtaka forðað forsvarsmönnum greinarinnar frá axarsköftum sem kalla á rannsóknir erlendra saksóknara?“
Grein Þórólfs má lesa hér.
