Fyrsti í bólu­setningu á morgun – Þau verða bólu­sett fyrst

Á morgun hefst bólu­setning gegn CO­VID-19 hér á landi, en eins og kunnugt er kom bólu­efni Pfizer til landsins í morgun.

Sérstök athöfn verður í húsnæði Landlæknis klukkan 9 þar sem fjórir starfsmenn Landspítalans verða bólusettir. Klukkan 10 hefjast aðrar bólu­setningar en þá verður hafist handa við að bólu­setja starfs­fólk Land­spítalans og ein­stak­linga á hjúkrunar­heimilum.

Í til­kynningu frá Heilsu­gæslunni á höfuð­borgar­svæðinu kemur fram að íbúi á hjúkrunar­heimilinu Selja­hlíð fái bólu­efni klukkan 10 í fyrra­málið, en um er að ræða rúm­lega sex­tugan ein­stak­ling. Sá heitir Þorleifur Hauksson að því er fram kemur á Vísi.

Á sama tíma fá fyrstu starfs­menn Land­spítalans bólu­efnið, en bólu­setningar spítalans fara á morgun fram í Skafta­hlíð, Landa­koti og á Vífils­stöðum. Reiknar spítalinn með því að það taki um tvo daga að bólu­setja þá 770 starfs­menn sem fyrsti skammtur dugar fyrir, að því er fram kemur í til­kynningu.

Eftir há­degi verður haldið á­fram að bólu­setja fram­línu­fólk í heil­brigðis­kerfinu, en þessar bólu­setningar fara fram á Suður­lands­braut.

Í til­kynningu sem Land­spítalinn sendi frá sér rétt fyrir jól kom fram að farið yrði eftir for­gangs­röðun sótt­varna­læknis og reglu­gerð um for­gangs­röðun um bólu­setningu við CO­VID-19. Þannig er starfs­fólki bráða­mót­töku í Foss­vogi, bráða­mót­töku barna, gjör­gæslu­deilda og CO­VID-19 göngu­deildar boðin bólu­setning. Einnig verður starfs­fólki sem tók auka­vaktir á þessum deildum í þriðju bylgju CO­VID-19 boðið bólu­setning.