Eyþór Arnalds, oddviti Sjálfstæðisflokks í Reykjavík, segir að Dóra Björt Guðjónsdóttir, borgarfulltrúi Pírata, hafi gert fátt annað undanfarið en að búa til samsæriskenningar.
Eyþór birtir aðsenda grein í Fréttablaðinu í dag en tilefnið er uppnám sem varð í borgarstjórn á þriðjudag þegar Dóra sakaði Eyþór um spillingu. Yfirskrift greinar Eyþórs er: Atkvæði óskast í skiptum fyrir lygar.
Dóra kom inn á eignarhlut Eyþórs í Árvakri, útgáfufélagi Morgunblaðsins, á fundi borgarstjórnar í vikunni og tengdi við uppbyggingu á Selfossi. Sagði hún að Eyþór virtist hafa fengið fleiri hundruð milljóna að gjöf frá Samherja. Sagðist Dóra ítrekað hafa spurt Eyþór út í málið en án fullnægjandi svara.
Eyþór er afar ósáttur við Dóru Björt eins og lesa má glögglega í grein hans í Fréttablaðinu.
„Eftir að hafa ráðist gegn Neyðarlínunni hefur hún snúið sér að mér persónulega. Hún hefur ítrekað haldið því fram að mér hafi verið mútað. Verið gefin hundruð milljóna gegn því að afhenda Samherja miðbæ Selfoss. Ekkert er fjær sanni,“ segir Eyþór sem segir að hann persónulega hafi ekki fengið eina krónu í greiðslu frá Samherja
„Hvað þá hundruð milljóna. Félag í minni eigu keypti hlut í Morgunblaðinu með seljendaláni eins og áður hefur komið fram.“
Eyþór bendir á að Reykjavíkurborg sjálf veiti seljendalán upp á hundruð milljóna í fjölda verkefna. Ef seljendalán teljist mútur í orðabók Pírata, þá séu þeir sjálfir að stunda þær.
„Ég sat í bæjarstjórn Árborgar 2006-2014, en skipulag miðbæjar Selfoss var samþykkt í íbúakosningu árið 2018. Byggingarleyfin voru síðan gefin út af Pírötum en ekki Sjálfstæðisflokki. Það er því fræðilega ómögulegt að gera mig ábyrgan fyrir þessu. Einfalt gúgl hefði getað bjargað Dóru frá því að koma með svona götótta samsæriskenningu,“ segir hann.
Eyþór vitnar svo í Joseph McCarty, öldungadeildarþingmann Repúblikana, frá 1947 til 1957.
„McCarthy beitti þeirri tækni að segja að viðkomandi þyrfti að „svara betur“. Sama hvernig svarið var. Nú er ég ekki að tala um Smára McCarthy þingmann og fyrrverandi hluthafa í Stundinni, heldur Joseph McCarthy þingmann. Síðasta grein Dóru í Stundinni nær nýjum lægðum, en þar tengir hún mig, Samherja og dómsmálaráðherra saman við Egyptaland og fjölskyldu flóttamanna,“ segir Eyþór sem endar grein sína á þessum orðum:
„Atkvæðaveiðarnar verða ekki dapurlegri. Það væri nær fyrir Pírata sem hafa verið við völd í 6 ár að svara fyrir hvers vegna heimilislausir eru tvöfalt fleiri en fólk hefur þurft að flytja úr Reykjavík vegna húsnæðisskorts. Mat eldri borgara og samgönguvandann. Og stöðu skólabarna innflytjenda. Ekkert af þessu hugnast Dóru Björt Guðjónsdóttur að ræða þrátt fyrir að hún sé formaður mannréttindaráðs borgarinnar sem kýs að fara á lægsta plan þess sem ræðst að persónu fólks. Án innistæðu. Það er ekki að furða að borgarstjórn mælist með lítið traust.“
