Frosti ekki sáttur: „Maður hefði haldið að maður í hans stöðu bæri að kynna sér þetta“

„Maður hefði haldið að maður í hans stöðu bæri að kynna sér þetta,“ segir Frosti Sigur­jóns­son, fyrr­verandi þing­maður Fram­sóknar­flokksins, um við­tal við Þór­ólf Guðna­son sótt­varna­lækni í Silfrinu í gær. Frosti hefur verið gagn­rýnin á yfir­völd hér á landi vegna CO­VID-19 far­aldursins.

Frosti gerir að um­tals­efni orð Þór­ólfs þess efnis að ekki sé hægt að koma í veg fyrir að veiran dreifi sér um sam­fé­lagið. Hann gefur lítið fyrir þau um­mæli og bendir á að yfir­völdum í Kína, Sjang­hæ, Taí­van og Hong Kong, hafi tekist að stöðva dreifingu veirunnar.

„Enda lifir veiran ekki nema nokkra daga utan líkamans og með kröftugt á­taki tókst þeim að stöðva dreifinguna. Við­skipta­lífið þar er að fara í gang, skólar að opna en auð­vitað er fylgst mjög vel með til að forðast að veiran komist aftur á kreik,“ segir Frosti í færslu á Face­book.

Þá segir hann að sótt­varnar­læknir hafi svarað því að hann viti ekki ná­kvæm­lega hvernig þessi ríki hafa náð þessum árangri. „Samt liggur það allt ljóst fyrir og hefur verið ræki­lega um það fjallað. Maður hefði haldið að maður í hans stöðu bæri að kynna sér þetta.“

Frosti heldur á­fram og gagn­rýnir þá stað­reynd að grunn­skólum skuli ekki vera lokað eins og fram­halds­skólum og há­skólum. Þór­ólfur hafi sagt að börn fái lítil ein­kenni og smiti ekki mikið.

„Hann vísar til þess að í Kína hafi börn verið að­eins 1% af þeim sem reyndust með smit. Hann virðist ekki vita að skýringin á því er sú að í Kína voru börn minna skimuð því þau voru ekki með ein­kenni. Þar eins og hér voru ein­kenna­lausir ekki skimaðir.“

Frosti gagn­rýnir einnig fleira í mál­flutningi Þór­ólfs.

„Svo segir hann "ef við erum mjög hörð og leyfum smitinu ekki að dreifast um sam­fé­lagið þá fáum við topp þegar við drögum úr að­gerðum."

Hann var ekki spurður hvaða vísinda­rann­sóknir sýni að fólk myndi ó­næmi gegn veirunni. Svarið er að enginn veit hvort ó­næmi myndast.

Hann var ekki spurður hvort það væri ekki gætnara að bíða með að draga úr varnar­að­gerðum þangað til búið er að fá vissu fyrir því að fólk myndi ó­næmi. Sá tími myndi líka nýtast til að þróa lyfja­með­ferðir og undir­búa heil­brigðis­kerfið svo hægt verði að bjarga fleiri manns­lífum.“

Frosti segir að lokum að Asíu­ríkin hafi greini­lega á­kveðið að stöðva dreifingu veirunnar til að kaupa tíma. Sá tími muni nýtast til að þróa lyf, jafn­vel bólu­efni, gegn sjúk­dómnum. „Hér er önnur stefna og hún hefur ekki verið rök­studd nægi­lega vel.“