Frið­jón gerir grín að Ragnari: Gagn­rýndi æsku­dýrkun – Varð sjálfur banka­stjóri 31 árs

„Ragnari Önundar­syni er upp­sigað við ungt fólk, telur það þurfa "afla sér starfs- og lífs­reynslu áður en það biður um æðsta frama". Annað en sá sem varð 31 árs banka­stjóri. Unga fólkið nú­til­dags!“

Þetta sagði Frið­jón R. Frið­jóns­son, al­manna­tengill og á­hrifa­maður í Sjálf­stæðis­flokknum, á Twitter-síðu sinni á dögunum. Þar svaraði hann Face­book-færslu Ragnars Önundar­sonar, banka­manns og fyrr­verandi banka­stjóra. Ragnar hafði þá deilt frétt Hring­brautar þar sem fjallað var um um­mæli Þor­bjargar Helgu Vig­fús­dóttur og gagn­rýni hennar á Sjálf­stæðis­flokkinn.

Sjá einnig: Þor­björg Helga: „Það er ekki í lagi með Sjálf­stæðis­flokkinn“

„Sjálf­stæðis­flokkurinn er enn í mesta basli í sínum kvenna­málum, al­gjör hrak­falla­bálkur. Nú tjáir þessi kona sig, en hún er ein þeirra sem fóru erindis­leysu fyrir flokkinn. Það sem flokkurinn þarf að gera er að hætta hégóma­skapnum og snúa sér aftur að pólitík. Í eina tíð aug­lýstu menn bíla með því að mynda létt­klæddar ungar og glæsi­legar konur sitjandi á húddinu, í von um að ná að draga augu karl­manna að bílnum. Að beita þessari að­ferð á stjórn­mála­flokk á 21. öldinni er vægast sagt undar­leg tíma­skekkja. Frændur okkar í Skandinavíu kjósa ekki flokka eftir út­liti for­ystu­fólksins, ekki þarf annað en líta á myndir af for­sætis­ráð­herrunum þeirra til að sann­færast um þetta. Unga fólkið sem ver miklum hluta af tíma sínum fyrir framan spegilinn ætti að afla sér starfs- og lífs­reynslu áður en það biður um æðsta frama. Kominn er tími á upp­gjör við aug­lýsinga- og yfir­borðs­mennskuna.“

Frið­jón bendir í færslu sinni á það að Ragnar hafi sjálfur orðið banka­stjóri Iðnaðar­banka Ís­lands þegar hann var 31 árs. Birtir hann skjá­skot af frétt frá árinu 1984. Færsla Frið­jóns vakti tals­verða at­hygli og var Þor­björg Helga sjálf meðal þeirra sem skrifuðu at­huga­semd við hana.

„Takk fyrir vörnina gamli vinur, var að sjá þetta fyrst núna. Ragnari er mjög illa við mig og hefur verið lengi. Enda er ég kona.“

Ragnari Önundarsyni er uppsigað við ungt fólk, telur það þurfa "afla sér starfs- og lífsreynslu áður en það biður um æðsta frama". Annað en sá sem varð 31 árs bankastjóri. Unga fólkið nútildags! pic.twitter.com/Cepu138U3D

— Friðjón Friðjónsson (@fridjon) February 12, 2021