„Við gengum í gegnum erfiðleika, ég og Anna konan mín og fjölskyldan. Við áttum von á okkar þriðja barna á þar síðasta ári. Barnið okkar dó í fæðingu sem er erfið og sár lífsreynsla. Svona sársauki og erfiðleikar geta tætt mann í sundur og eyðilagt mann“.
Þetta segir Freyr Eyjólfsson tónlistarmaður sem starfað hefur í fjölmiðlum hin seinustu ár. Hann er nú upplýsingafulltrúi endurvinnslufyrirtækisins Terra. Í þætti Sigurlaugar M. Jónasdóttur á Rás 1, Segðu mér, opnaði Freyr sig um sína erfiðustu lífsreynslu. Fyrir hálfu öðru ári misstu Freyr og kona hans, Hólmfríður Anna barn í fæðingu.
„Svona sársauki getur bara tætt mann í sundur og eyðilagt. En ef maður tekst á við það með ást og kærleika og leitar eftir stuðningi, þá fer maður einhvern veginn í gegnum þetta,“ segir Freyr og bætir við að slík reynsla marki fólk fyrir lífstíð. Sársaukinn sé djúpur enn geti einnig dýpkað fólk.
Aðspurður hvort þetta hafi breytt þeim sem fjölskyldu svarar Freyr:
„Nú eigum við tvö börn á lífi og eitt englabarn. [...] Maður fer í svona djúp, kalt erfitt djúp. Sársauki er líka eins og eldur, getur brennt mann upp til agna en líka styrkt mann.
Þá tekur Freyr dæmi um hvernig lífsreynslan hafi breytt honum:
„Stundum þegar maður er á kaffihúsi og kaffibollinn kemur ekki alveg á stundinni, þá þarf maður ekki endilega að hella sér yfir viðkomandi manneskju. Það getur bara vel verið að sú manneskja hafi átt mjög erfiðan dag eða eigi mjög erfiðan dag.“
Hann bætir við að missa barn sé mesti sársauki lífsins.
„En lífið er að mörgu leyti sársauki, lífið er bara erfitt, og þess vegna þurfum við líka að sækja í lífsgleðina og kærleikann,“ segir Freyr og bætir við: „Við finnum það með öðru fólki, ef maður tengist ástvinum sínum og fjölskyldu á sterkan hátt fær maður lífskraft og hjálp þar.“
Hér má lesa viðtalið við Frey í heild sinni.
