Fréttaflutningur af áfengi á leikdegi veldur usla: „Vonandi hella þær sig bara fullar, þoli ekki þetta forræðishyggjubull“

6. september 2022 kl. 11:33

Fréttir & pistlar

Íslenska kvennalandsliðið á möguleika á að komast á HM í knattspyrnu í kvöld ef liðið vinnur eða gerir jafntefli við Holland í Utrecht. Það yrðu afar merk tímamót í sögu íslenskrar knattspyrnu. Tapi liðið þarf það að fara í umspil í október.

Ef það gengur eftir verður kampavínsflaska í boði KSÍ opnuð samkvæmt Vísi.

Í fyrra var samþykkt vinnuregla hjá stjórn KSÍ að áfengi sé ekki veitt í keppnisferðum á því sé gerð undanþága þegar frábær, íþróttalegur árangur náist. Sæti á HM fellur hiklaust undir þá skilgreiningu.

Það að drukkið sé áfengi í landsliðsferðum hefur dregið mikinn dilk á eftir sér á síðustu misserum því tveir landsliðsþjálfarar hafa orðið að víkja í kjölfar áfengisneyslu í landsliðsferðum. Það eru Eiður Smári Guðjohnsen, fyrrverandi aðstoðarlandsliðsþjálfari karla, og forveri núverandi landsliðsþjálfara kvenna, Jón Þór Hauksson.

Hallbera Guðný Gísladóttir, sem lagði skónna á hilluna með landsliðinu eftir EM í sumar, er ekki ánægð með umfjöllun um þessi mál.

„Á mögulega stærsta leikdegi kvennalandsliðsins frá upphafi er eðlilega verið að skrifa frétt um það hvort fullorðið fólk ætli sér virkilega að skála í kampavíni ef það kemst á HM í fyrsta skipti. Jahérnahér,“ skrifar Hallbera.

Freyr Alexandersson, fyrrum landsliðsþjálfari, skrifar „Ég verð brjálaður ef það verður kampavín. Það er spilað í Hollandi.Það á skála Í Heineken,“ skrifar Freyr.

Hilmar Jökull, meðlimur Tólfunnar, leggur einnig orð í belg: „Vonandi hella þær sig bara fullar og hafa gaman af þessu, þoli ekki þetta forræðishyggjubull“