Smásölurisinn Hagar þarf að taka á sig umtalsverðan kostnað vegna starfsloka Finns Árnasonar forstjóra og Guðmundar Marteinssonar, framkvæmdastjóra Bónus.
Fjallað er um málið í Markaðnum, viðskiptariti Fréttablaðsins, í dag en þar segir að Hagar þurfi að gjaldfæra hjá sér yfir 300 milljóna króna einskiptiskostnað vegna starfsloka þeirra. Herma heimildir Markaðarins að Guðmundur, sem hefur starfað hjá Bónus í nærri þrjá áratugi, sé með þriggja ára uppsagnarfrest. Finnur Árnason, sem hefur verið forstjóri Haga frá árinu 2005, er aftur á móti með eins árs uppsagnarfrest.
Báðir hafa þeir verið í hópi launahæstu stjórnenda landsins undanfarin ár. Þannig var Finnur með ríflega sex milljónir króna á mánuði í laun og hlunnindi á síðasta rekstrarári. Samkvæmt tekjublaði Frjálsrar verslunar í fyrra, sem Markaðurinn vitnar til, var Guðmundur með um 5 milljónir króna á mánuði árið 2018.
Þá segir Markaðurinn að vegna ákvæða í starfssamningum þeirra skipti ekki máli hvort þeir hafi látið sjálfir af störfum eða verið sagt upp. Félagið muni þurfa að taka á sig umtalsverðan kostnað vegna starfsloka þeirra sem tilkynnt var um í síðustu viku.
Frétt Markaðarins.
