Föstum skotum er skotið að Hrafnhildi Ástu Þorvaldsdóttur, framkvæmdastjóra LÍN, í pistli á vef Kvennablaðsins. Pistillinn ber yfirskriftina: Frænka Davíðs auglýsir störf en bara fyrir lesendur Morgunblaðsins.
Pistilinn er merktur ritstjórn Kvennablaðsins og því ekki ljóst hver heldur á penna, en þess má geta að Steinunn Ólína Þorsteinsdóttir er ritstjóri vefmiðilsins.
Tilefni pistilsins er heilsíðuauglýsing sem birtist í Morgunblaðinu um helgina en þar voru auglýst fjögur laus störf hjá sjóðnum. Það vakti athygli pistlahöfundar að LÍN hafi ekki auglýst í öðrum fjölmiðlum landsins og er bent á að Hrafnhildur Ásta sé náfrænka Davíðs Oddssonar, ritstjóra Morgunblaðsins.
„Mogginn berst í bökkum svo framlag LÍN til auglýsingatekna Morgunblaðsins hlýtur að hjálpa talsvert til. Framkvæmdastjóri LÍN, Hrafnhildur Ásta Þorvaldsdóttir, er náfrænka ritstjóra Morgunblaðsins svo að það er virkilega falleg frændsemi þarna á ferðinni og ákveðið listfengi í því hvernig hið opinbera ver með öllum tiltækum ráðum Málgagnið,“ segir í pistlinum.
Höfundur vandar lesendum Morgunblaðsins svo ekki beint kveðjurnar.
„Það sætir samt furðu að LÍN skuli eingöngu leita eftir starfskröftum úr röðum lesenda Morgunblaðsins sem eru flestir komnir af fótum fram, geta vart ritað nafnið sitt lengur svo það skiljist og ekki líklegir að endast við þungbæra skrifstofuvinnu.“
