Benedikt Jóhannesson, fyrrverandi fjármálaráðherra og fyrrverandi formaður Viðreisnar, hefur enga trú á því að búið sé að ákveða hverjum hlutur ríkisins í Íslandsbanka verður seldur.
Benedikt var í viðtali við Harmageddon á X-inu 977 í morgun þar sem hann ræddi yfirvofandi sölu á hlut ríkisins í bankanum.
„Ég er viss um að svo er ekki. Það er auðvelt að skapa tortyggni og eins og ég sagði áðan þá skil ég hana vel. Það er ekki þannig að það sé einhver S-hópur sem bíður og ég held að hann verði ekki seldur aftur til Björgólfsfeðga,“ sagði Benedikt sem er frændi Bjarna Benediktssonar fjármálaráðherra, en flest bendir til þess að Bjarni muni leiða söluna á bankanum.
Í viðtalinu sagðist Benedikt sjálfur vera þeirrar skoðunar að réttast væri að selja hlut ríkisins í bankanum. „Þegar ég var fjármálaráðherra var það hluti af eigendastefnu ríkisins að selja bankann og það hefur ekkert breyst síðan. Það er líka stefna núverandi stjórnar.“
Benedikt nýtti tækifærið í viðtalinu og hnýtti í frænda sinn og sagði að gallinn við fyrirhugaða sölu nú sé sá hvað ríkisreksturinn er ráðalaus. „Það hefur vakið litla athygli en það stendur til að skuldsetja þjóðina um þúsund milljarða á fimm árum,“ segir Benedikt sem óttast að sala á fjórðungshlut, fyrir 30-40 milljarða króna, verði dropi í hafið í því eyðsluhafi sem blasir við.
„Hluti af ótta mínum er hvað mér finnst lítil ábyrgð í ríkisfjármálunum og lítil framsýni.“
