Hallur Magnússon, fyrrverandi varaforborgarfulltrúi og fyrrverandi embættismaður hjá ríki og sveitarfélagi, skrifaði grein í Morgunblaðið í dag um kynningarfund Reykjavíkurborgar sem hann sótti á dögunum líkt og fjallað var um á Hringbraut fyrr í dag.
Þar voru kynntar fyrirhugaðar breytingar í Háaleitis- og Bústaðahverfi og segist Halldór ekki hafa upplifað viðlíka stemningu áður.
Brá við lesturinn
Í grein sinni sagði Halldór að formaður borgarráðs hefði varið „á dónalegan hátt vafasamar fyrirliggjandi tillögur gegn andmælum þeirra eldri borgara hverfisins sem dirfðust að tjá sig.“ Formaður borgarráðs er Þórdís Lóa Þórhallsdóttir úr Viðreisn. Í færslu á Facebook segir Þórdís Lóa að henni hafi brugðið við lestur Morgunblaðsins með morgunkaffinu.
„Stundum er pólitíkin skrítin.
Í morgun sundlaðist mér á morgunkaffinu þegar ég las í Morgunblaðinu að ég, sem formaður borgarráðs, hefði verið dónaleg við eldra fólk á fundi um hverfaskipulag í Réttarholtsskóla í síðustu viku. Ég var ekki á þeim fundi. Ég var í kvöldmat með gömlum menntaskólavinum og því víðsfjarri þessum fundi.“
Í ummælum við færslu hennar biðst Hallur afsökunar á því að fara mannavillt. „Takk fyrir þetta Þórdís Lóa. Biðst aftur innilegrar afsökunar. Ég átti við foseta borgarstjórnar sem var á fundinum - en ekki þig. Gamli blaðamaðurinn klikkaði á að tvítékka titlana áður en hann sendi frá sér skrifin.“
Alexandra Bríem, forseti borgarstjórnar og borgarfulltrúi Pírata, skrifar einnig ummæli við færslu Þórdísar Lóu. „Sæll Hallur, mér finnst leitt að þú hafir upplifað mig dónalega þarna, og sumum kann að finnast að ég hefði átt að halda mig til hlés“, skrifar Alexandra.
„Að mínu viti var ég ákveðin, en ekki dónaleg. En það getur vissulega verið vandmeðfarið og mér finnst það raunverulega leitt hafi ég farið vitlausu megin við þá línu,“ skrifar hún enn fremur og þakkar Hallur henni fyrir innleggið.
