Jónína Benediktsdóttir, athafnakona og íþróttafræðingur, er gestur í podcast-þætti Sölva Tryggvasonar. Óhætt er að segja að Jónína komi víða við í viðtalinu og segi margar sögur, skemmtilegar í bland við erfiðar.
Í viðtalinu segir Jónína meðal annars frá tengslum hennar og Jóns Páls Sigmarssonar, sterkasta manns heims. Á milli Jóns Páls og Jónínu var sterkur strengur í mörg ár.
„Jón Páll var einstakur maður. Hann var svo lítillátur og skemmtilegur og fór aldrei fram á neitt. Hann var eins ósérhlífinn og einn maður getur verið. Hann vann hjá mér í 3 ár og við ferðuðumst mikið saman og elskuðum hvort annað. En það gekk ekki upp og við það lifir maður. Það var alltaf gaman með Jóni Páli og ég gæti sagt þér skemmtisögur af Jóni Páli endalaust og það var Jóhannes heitinn (Jónsson) líka. Hrikalega skemmtilegur maður og kannski er það það sem að ég er að leita í þegar kemur að karlmönnum. Svona hressir galgopagæjar af því að ég nenni ekki að vera alvarleg þegar ég er heima hjá mér,“ segir Jónína en svo kom sorgin þegar Jón Páll féll frá langt fyrir aldur fram.
„Ég fór með honum til Ameríku rétt áður en hann deyr og þá fór hann til læknis og fékk í raun dauðadóminn. Honum var sagt að æðakerfið í honum væri eins og í níræðum manni og við vissum eftir það bæði að hann myndi deyja fljótt eftir þetta.”
Í viðtalinu fara Sölvi og Jónína yfir tímabilin í líkamsræktinni, tengslin við Jón Pál, íslenskt viðskiptalíf, baráttuna við Bakkus og margt margt fleira. Þáttinn í heild má sjá hér að neðan:
