Veirufaraldurinn fer yfir heiminn og undanfarið höfum við beint sjónum okkar aðallega að Vesturlöndum.
En hvað með næst stærstu álfu heimsins, Afríku? Hvað með þriðja heiminn?
„Í þessum ríkjum mörgum er lög og regla ekki virt. Þannig að ákveðin hefð er fyrir því að fólk taki lögin í sínar hendur og til dæmis í Haítí þá hefur það beinlínis gerst að fólk hefur verið drepið vegna þess að það er með veiruna“, segir Páll Ásgeir Davíðsson, lögfræðingur í þættinum 21. Páll Ásgeir hefur um langt árabil unnið ráðgjafastörf innan Sameinuðu þjóðanna hjá Þróunar- og samvinnustofnun þeirra; verið á vettvangi eftir náttúruhamfarir eða stríðsátök. Nefna má lönd eins og Kenía, Kongó, Súdan, Líbería‚ Írak, Haíti og Kamerún sem Páll Ásgeir þekkir vel til vegna vinnu sinnar.
Hver er geta ríkjanna í álfunni til að meta útbreiðslu Covid-19?
„Ég held að það sé einmitt vandamálið, það er oft talað um svörtu Afríku, ekki bara út frá litarhætti fólksins heldur vegna þess að þetta er hluti heimsins sem fólk þekkti hvað síðast og kortlagði hvað síðast, segir Páll Ásgeir og tekur dæmi um Haítí þar sem hann starfaði mikið.
„Geta þessara ríkja, þessara veikburða ríkja er mjög takmörkuð, ef við skoðum ríki eins og ég var að vinna í síðast, Haítí þá eru opinerar tölur ekkert hræðilegar. Um hundrað manns hafa sýkst og um tíu manns hafa látist en ef við förum aðeins nánar inn í þetta þá er verið að skima fyrir veirunni bara í höfuðborginni og geta og aðferðafræðin sem er notuð er mjög vafasöm“.
„Ef við skoðum mörg þessara ríkja þá er engin heilsugæsla sem fólk hefur aðgang að. Við erum að tala um að það þarf kannski að labba nokkra daga í gegnum skóginn til að komast á næstu heilsugæslustöð og á mörgum svæðum eins og Kongó þá ertu bara að nota Shamana, grasalækna og þeir eru þeir helstu sem vinna með heilsugæslunni“, bætir Páll Ásgeir við.
