Fjöl­skyldan vildi bara fá leigðan bú­stað um helgina en fékk al­deilis að heyra það

Segja má að allt hafi ætlað um koll að keyra í hinum fjöl­menna Face­book-hópi Landið mitt Ís­land í gær­kvöldi. Kona setti þar inn færslu sem var svo­hljóðandi:

„Við erum 4 manna fjöl­skylda sem langar í bú­staðar­ferð helgina 9-11 okt, ekki langt frá Reykja­vík samt. Al­ger nauð­syn að það sé heitur pottur. Er ein­hver til í að leigja okkur á sann­gjörnu verði. Erum vel hús­vön.“

Um það leyti sem færslan birtist voru strangari að­gerðir á höfuð­borgar­svæðinu í undir­búningi vegna kórónu­veirufar­aldursins og voru þær til­kynntar um klukku­stund síðar. Konan sem setti færsluna inn fékk yfir sig hol­skeflu af gagn­rýni frá hneyksluðum net­verjum sem veltu fyrir sér hvernig konunni dytti það í hug að fara með fjöl­skylduna sína í bú­stað í því á­standi sem ríkir.

Konunni var bent á að verið væri að hvetja fólk til að vera heima og sagði konan sem óskaði eftir bú­stað þá í einni at­huga­semd að fjöl­skyldan ætli bara að vera í bú­staðnum og ekki hitta neinn. Þá komu svör eins og til dæmis þessi:

„Fjallar ekki bara um að hitta fáa, heldur líka að minnka ferða­lög og fólk á vegum svo minna verði um um­ferðar­ó­höpp og annað sem gætu aukið álag á sjúkra­húsin.“

„Ó­höpp gera ekki boð á undan sér. Á venju­legu ári er mesta á­lagið á bráða­vaktinni á Sel­fossi vegna slysa sem verða í sumar­húsum.“

„En hvað með fólkið sem þarf að þrífa eftir ykkur? Þú ert að stefna því í hættu með að fara í bú­stað.“

„Hvað er að fólki getur það ekki verið heima hjá sér þegar á­standið er svona slæmt í þjóð­fé­laginu það hugsar bara um sjálft sig og sínar langanir.“

„Þessi póstur/ beiðni út­skýrir ná­kvæm­lega af hverju við erum öll í þessum skít.“

Þess má svo geta að margir koma konunni til varnar og benda á að ó­þarfi sé að sýna konunni dóna­skap. Þegar þetta er skrifað hafa hátt í 200 at­huga­semdir verið skrifaðar við færsluna – og þær snúast fæstar um það sem konan spurði efnis­lega um.

„Hérna.. hvað er að fólki? 4 manna fjöl­skylda sem býr saman að fara saman í bú­stað án þess að hitta neinn. Aug­ljóst að fólk sem kommentar hér hefur engan hitt í 6 mánuði.“

„Vá. Konan kom ekki hér inn í leit að upp­eldis­ráðum og um­vöndun, er það?“