Egypska fjölskyldan sem stendur til að vísa úr landi á miðvikudag gekkst undir COVID-19-próf í fylgd þriggja lögreglumanna í dag.
Sagt er frá þessu á vef Fréttablaðsins sem birtir myndband af fjölskyldunni sem tekið var eftir að fjölskyldan gekkst undir skimunina. Um er að ræða hjónin Dooa og Ibrahim og börn þeirra fjögur sem komu hingað til lands árið 2018.
Fjölskyldunni var neitað um vernd og bendir flest til þess að hún verði send úr landi þann 16. september næstkomandi.
„Ég hef verið í sambandi við þetta fólk undanfarið og hef aldrei séð þau eins hrædd og í dag. Þau voru hér í fylgd lögreglu, þau voru ekki frjáls,“ segir maður sem Fréttablaðið ræddi við en hann vildi ekki láta nafns síns getið.
Þá staðfestir lögmaður fjölskyldunnar, Magnús D. Norðdahl, að fólkið hafi verið hvekkt og hrætt en þau trúi því enn að ekki verði að brottvísuninni. „COVID-prófið er partur af þessari þvinguðu brottvísun sem að óbreyttu á að fara fram á miðvikudaginn, en við trúum því og treystum að svo verði ekki,“ segir Magnús.
Nánar er fjallað um málið á vef Fréttablaðsins.
