„Tveimur vikum eftir að lætin hófust fékk ég pestina sjálfur. Ég hef aldrei orðið eins veikur,“ segir Ferdinand Jónsson, geðlæknir í London, í pistli í nýjasta tölublaði Læknablaðsins.
Ferdinand hefur búið í London undanfarin 23 ár en í Læknablaðinu skrifar hann um COVID-19 faraldurinn. „Sem aðrir hef ég sokkið inn í heim Covid-19. Ég hef haft miklar áhyggjur af mínu veikasta fólki. Og óttast að það gæti komið illa út úr þessum hamförum,“ segir Ferdinand sem ber saman viðbrögð breskra yfirvalda og þeirra íslensku.
Hann segir að þau hafi verið ólík og segist hann hafa dáðst að íslenskum yfirvöldum fyrir að leyfa besta fólkinu að ráða og nefnir hann þríeykið Þórólf, Ölmu og Víði í því samhengi. „Bretland er með böggum hildar. Þar flýgur hver eins og hann er fiðraður. Fólk sem metur lítt sannleikann ræður illa við áskorun eins og Covid-19,“ segir Ferdinand sem veiktist sjálfur illa af COVID-19.
„Og maður hugsar um dauðann, í sínum litla súrefnissnauða heimi, einsemdina og það að treysta ekki. Hér hafa öldur brotnað af þunga. Læknar eru þekktir sem lélegir sjúklingar. Ég hélt að ég væri skárri, vegna reynslu af langvinnum, alvarlegum veikindum. Svo var ekki. Ótti og afneitun hafa verið við völd,“ segir hann og bætir við að COVID-19 hafi minnt á hann á hvað mikilvægast er.
„Covid-19 hefur minnt mig á hvað mikilvægast er. Ég vissi að vinátta er fegurst á erfiðum tímum. Fegurri en allt. Þá vissu hef ég fengið staðfesta núna.“
Pistil hans má lesa í heild sinni á vef Læknablaðsins.
