„Við teljum ekki rétt eða gerlegt að skylda ferðamenn til að sækja appið, frekar höfðum við til skynsemi og þess að það verður virði í því fólgið að hafa appið,“ sagði Alma D. Möller landlækni á blaðamannafundi í dag.
Ferðamenn verða ekki skyldaðir til að sækja rakningarappið svokallaða, en það getur auðveldað mjög að rekja ferðir þeirra sem hugsanlega koma til með að greinast með COVID-19. Skipulagðar skimanir vegna COVID-19 meðal þeirra sem koma til landsins hefjast næstkomandi mánudag.
Hringbraut fjallaði í dag um ræðu Þorbjargar Sigríðar Gunnlaugsdóttur, þingmanns Viðreisnar, í gær þar sem hún velti fyrir sér hvort nauðsynlegt væri að nota appið nú þegar nær engin smit eru í samfélaginu. Velti hún þessu fyrir sér meðal annars út frá persónuverndarsjónarmiðum.
Alma sagði á blaðamannafundinum að ferðamenn yrðu hvattir til að sækja appið en erfitt væri að gera það að skyldu. Alma ítrekaði þó, að því er segir í frétt Fréttablaðsins, að persónuverndarsjónarmið og friðhelgi einkalífs væru í forgrunni.
„Öll gögn eru einungis geymd á snjalltækinu, ekki í skýi og ekki í miðlægum gagnagrunni,“ sagði Alma.
