Jóhannes Þór Skúlason, framkvæmdastjóri Samtaka ferðaþjónustunnar, segist ekki fá betur séð en að ríkisstjórnin hafi tekið meðvitaða ákvörðun um að fórna þeim efnahagslegu hagsmunum sem felast í því að hafa ferðaþjónustuna opna.
Jóhannes segir þetta í samtali við mbl.is. Eins og kunnugt er tilkynntu yfirvöld um hertar aðgerðir við landamærin og þurfa allir þeir sem koma til landsins að fara í tvær sýnatökur og sóttkví í fjórta til fimm daga á milli þeirra. Þetta á líka við um ferðamenn frá löndum sem hingað til hafa verið talin örugg, Danmörku og Þýskalandi sem dæmi. Jóhannes á von á því að margir muni afbóka ferðir sínar.
„Ferðamenn koma ekki til landsins til að sitja í sóttkví í fjóra daga,“ segir hann og á auk þess von á frekari uppsögnum í íslenskri ferðaþjónustu í ljósi þessara tíðinda. Þá segist hann ekki hafa búist við að stjórnvöld myndu ganga svona langt.
Í Baklandi ferðaþjónustunnar á Faceboook hafa skapast líflegar umræður um tíðindi dagsins og lýsa margir sárum vonbrigðum eins og sést á mörgum athugasemdum:
„Þetta er svakalegt högg ...“
„Þetta er orðið hrikalegt ástand ....“
„Afleit niðurstaða sem mun hafa þungar afleiðingar fyrir hagkerfið.“
„Guð blessi ferðaþjónustu á Íslandi.“
