Lögreglan á Suðurnesjum kom erlendu pari til aðstoðar í gærmorgun en parið hafði samband við lögreglu og sagði farir sínar ekki sléttar.
Í skeyti frá lögreglu kemur fram að parið hafi ætlað til Reykjavíkur en eitthvað varð til þess að þau settu ranga staðarákvörðun inn í Google Maps.
„Þau voru komin langt út fyrir Innri – Njarðvík þegar þau höfðu samband og þar að auki búin að festa bílinn. Lögregla kom þeim til aðstoðar og fylgdi þeim að afleggjaranum að Reykjanesbraut. Héldu þau svo leiðar sinnar áleiðis til Reykjavíkur,“ segir í skeyti lögreglu.
Þá segir einnig af ölvuðum ökumanni sem ók niður ljósastaur á Reykjanesbraut um helgina. Hann slapp við meiriháttar meiðsl en bifreið mannsins var fjarlægð með dráttarbifreið.
Þá voru nokkrir ökumenn kærðir fyrir hraðakstur og mældist sá sem hraðast ók á 145 kílómetra hraða þar sem hámarkshraði er 90 kílómetrar á klukkustund. Þá voru fáeinir teknir úr umferð vegna gruns um vímuefnaakstur.
