Bandaríski ferðamaðurinn sem leitað hefur verið af á gossvæðinu er fundinn heill á húfi. Úlfar Lúðvíksson, lögreglustjóri á Suðurnesjum staðfestir þetta í samtali við Fréttablaðið.
„Hann er fundinn heill á húfi,“ segir Úlfar í samtali við Fréttablaðið.
Scott Estill, 59 ára Bandaríkjamaður, varð viðskila við eiginkonu sína á gossvæðinu í Geldingadölum um miðjan dag í gær og hefur leit að honum staðið yfir síðan. Tugir björgunarsveitarmanna, leitar- og sporhundar auk þyrlu Landhelgisgæslunnar hafa tekið þátt í leitinni.
Steinar Þór Kristinsson, sem er í svæðistjórn björgunarsveita á Suðurnesjum, segir í samtali við Fréttablaðið að um 260 manns hafi tekið þátt í leitinni í heildina. Rúmlega hundrað í dag.
„Þvílíkar gleðifréttir kæru vinir“
„Þvílíkar gleðifréttir kæru vinir,“ skrifar Lögreglan á Suðurnesjum í Facebook færslu rétt í þessu.
„Maðurinn sem leitað hefur verið að síðan í gær fannst rétt í þessu heill á húfi. Hann er aðeins hruflaður og meiddur og er verið að flytja hann til skoðunar á sjúkrahús. Af tillitssemi við hann ætlum við að fjarlægja fyrri færslu þar sem lýst var eftir honum. Eigið góðan og fallegan dag kæru landsmenn,“ segir enn fremur í færslunni.
